FDN deklara apoia VIII Governu

Portavoz Frenti Dezenvolvimentu Nasional (FDN), Hermenegildo Lopes ‘Kupa’,  deklara, prontu apoiu VIII, karik Primeiru Ministru, Taur Matan Ruak, presiza FDN nia apoiu.

Hermenegildo dehan, iha sorumutu ho PM Taur Matan Ruak ne’e, FDN la husu buat ida husi Xefi Governu, maibé fó de’it parabens ba VIII Governu. Maibé Hermengildo dehan, kuandu Primeiru Ministru konsidera ka presiza apoiu FDN nian ba Governasaun, FDN prontu fó apoiu.

“Ha’u hanoin ami mai la’os atu husu jata ka husu ida ne’e, ami-nia prinsipiu mak ne’e, sidadaun Timoroan ida, la’os husi ami FDN ne’ebé apoiu de’it, Primeiru Ministru tau konfiansa kaer kargu ruma ba Governasaun ida ne’e ou kontribui ba area balu karik, ha’u hanoin ami laiha objesaun, ho ami nia konsensia, tenki fó apoiu tomak ba Primeiru Ministru ba konfiansa ne’ebé fó, tanba apoiu ne’e diak ba ita nia rai ne’e,”  katak Kupa ba jornalista sira iha Palasiu Governu, Tersa (11/09), hafoin hasoru malu ho PM Taur Matan Ruak.

Kupa haktuir, FDN kompostu husi partidu sira ne’ebé uluk laiha asentu Parlamentar iha eleisaun liu ba, fó parabens ba Primeiru Ministru, ne’ebé iha fulan hirka nia laran, povu Timor Leste hotu preokupa katak, iha situasaun impase polítiku, Primeiru Ministru, Taur Matan Ruak, bele lidera ida ne’e to’o remata.

Nia hatutan, iha semana kotuk, VIII Governu ne’ebé lidera husi Xefi Governu, Taur Matan Ruak, aprezenta ona Orsamentu Jeral Estadu 2018 iha Parlamentu Nasional, no hetan ona aprovasaun ho diskusaun ida ne’ebé dinámiku ho bankada opozisaun sira.

“Públiku nia espetativa katak, Primeiru Ministru, Taur Matan Ruak hanesan Jeneral ida lidera Governu ida ne’e, hatudu pensamentu ida ne’ebé rona hot-hotu nia opiniaun, ida ne’e hanesan orgullu ida ba ami ne’ebé uluk fó apoiu ba nia, tanba ne’e mak ami mai fó parabens ba nia,” relata Kupa.

Nia haktuir, FDN sei kontinua fó nia apoiu tomak ba VIII Governu ida ne’e, hodi hala’o dezenvolvimentu ba rai laran, no hadia povu nia ekonómia.

“Hakarak fó apelu ba povu tomak katak, hot-hotu ita fó konfiansa ba Primeiru Ministru, ho  maun Xanana Gusmão, mesmu la hola parte iha Governu nia laran, mas sei fó nafatin korajen no apoiu ba Governu ida ne’e, hamutuk ho Prezidenti Repúblika, tanba sira mai husi ailaran hotu, no foin dadauk hatudu ona ida ne’e iha Parlamentu Nasional, hot-hotu iha vontade atu apoiu Governu hodi povu bele moris diak liu tan, no ultrapasa impase polítiku ne’e,” katak Kupa.

Portavoz FDN ne’e dehan, Orsamentu Jeral Estadu 2018 haruka ona ba Prezidenti Repúblika atu promulga hodi Governu bele hala’o servisu ba povu.

“Primeiru Ministru mós optimista, no hotu-hotu fiar katak, Prezidenti Repúblika la’os lider ida baibain, maibé lider veteranu ida ne’ebé iha kuñesimentu kona ba povu nia moris, ha’u fiar katak, Prezidenti Repúblika sei promulga orsamentu ida ne’e, ba funsionamentu Estadu rai ida ne’e nian, para ita komesa atrai ona investor sira mai husi rai laran atu mai kuda sira nia osan iha Timor Leste, atu kria kampu traballu ba Timoroan sira,” dehan Kupa.

Tuir Kupa Iha sorumutu ne’e, PM Taur husu ba portavoz FDN  atu kontinua konsolida povu hodi servisu hamutuk, tanba palku polítiku liu tiha ona.cos

Leave a Reply

Your email address will not be published. Required fields are marked *