PN loke konkursu kandidatu PDHJ

Atu reforsa integridade no garante governasaun di’ak, Parlamentu Nasional (PN), loke ona avizu formal ida ba públiku, atu konkore ba pozisaun Provedor Direitu Humanu no Justisa (PDHJ), hodi fiskaliza prosesu governasaun iha Timor-Leste (TL).

“Ami ajenda ona kona-bá kandidatura ba PDHJ, tanba ne’e orsida (horiseik-red) ami sei asina avizu formal hakarak loke aprezentasuan kandidatura ba PDHJ, durante loron 15 ba sidadaun TL tomak. Sé maka hakarak partisipa aprezenta kandidatura, komesa ohin (horiseik-red) nakloke ba sidadaun Timoroan sira ne’ebé priense kriteria tuir lei, atu nune’e bele aprezenta ninia kandidatura, dentro de loron 15”, Prezidenti PN, Arão Noe ba jornalista sira hafoin remata enkontru entre lider bankada sira, iha salaun konferensia PN, Díli, Sesta (21-09-2018).

Nia akresenta, depois de kandidatu sira hatama dokumentu maka foin halo apresiasaun no avaliasaun dokumentu, halo apresiasaun iha plenária liu husi votasaun, maka foin eleje kandidatu ne’ebé eleitu sai PDHJ, durante mandatu tinan 4 ba oin.

“Kriteriu ne’ebé kandidatu sira tenki priense maka, tenki iha koñesimentu ba área direitu humanu ho boa governasaun, tenki ho personalidade di’ak, tenki iha deklarasaun husi tribunal, fízikamente di’ak, iha kapasidade tékniku para halo relatóriu pareser”, haktuir Arão Noe.

Nia hatutan, kandidatu PDHJ hirak ne’e tenki priense kriteria, tanba TL sai membru CPLP no kada tinan PDHJ sempre halo reuniaun, entaun presiza ema ne’ebé iha kapasidade intelektual di’ak no figura di’ak iha TL.

Tuir lei fulan ida antes mandatu atual PDHJ, tenki iha prosesu konkursu, atu nune’e prosesu ne’e la’o kedas no sé kandidatu prontu ona no mandatu PDHJ tuan remata, kandidatu ne’ebé eleitu eleje kedas funsaun.

Entretantu mandatu PDHJ, Silveiro Pinto, hahú husi loron 24, fulan Outubru, tinan 2015 no sei remata iha loron 24, fulan Outubru , tinan ida ne’e. ves

Leave a Reply

Your email address will not be published. Required fields are marked *