PN aprova propsota sosa kareta 48 ba deputadu foun

Atu fasilita deputadu V lejislatura sira nia servisu ia Parlamentu Nasional (PN) no halo fiskalizasaun iha terenu, Sesta (19/10), PN aprova ona proposta sosa kareta 48 ho votus a favor 14, kontra 13 no abstensaun 11.

“Ohin (horibain-tolu-red) ho rezultadu votasaun a favor 14, kontra 13 no abstensaun 11, signifika katak proposta ida ne’e pasa, atu iha 2019 PN sei providensia hola kareta 48 ba deputadu foun sira no deputadu ne’ebé re-eleitu no kareta iha sira nia liman, sei la sosa kareta, maibé iha ano fiskal 2020 maka sei preve orsamentu hodi sosa kareta, nune’e la signifika deputadu tuan sira lakon direitu atu sosa kareta foun”, Primeira Vise Prezidente PN, Maria Angelina Sarmento, ba jornalista sira iha uma fukun PN, Sesta (19-10-2018).

Nia esplika, antes ne’e Konsellu Administrasaun propoin atu sosa kareta foun ba deputadu 65 iha V lejislatura, maibé tanba deputadu balun propoin halo redusaun hodi sosa fazeadamente, ho nune’e desididu sosa uluk kareta 48 ba deputdu foun sira.

“Sosa fazeadamente, atu iha prosesu 2019 nia orsamentu ne’e, labele membengkak iha sosa kareta foun, entaun ida ne’e maka desizaun ikus, votasaun ne’e a favor 14 atu hola de’it 48 veikulu, 13 vota kontra no 11 abstensaun. Ha’u mós la lembra kareta nia kustu hira, maibé ida ne’ebé importante liu maka sosa kareta fazeadamente, la hola dala ida ba deputadu 65 ne’e. Por em quanto kareta ne’ebé KA propoin maka Pajero Sport, tanba ninia presu ne’e mais adekuadu no rajuavel ba PN atu sosa”,haktuir Maria Sarmento.

Primeira Vise Prezidente PN ne’e informa, total orsamentu atu sosa kareta ne’e, seidauk bele pronunsia, tanba durante debate hotu-hotu hatene katak halo redusaun lubuk ida, mezmu kustu primeiru atu sosa kareta ho dolar millaun 2.700 (dois milhões sete centos e tall), ne’e signifika verba ida ba kapital meñor atu sosa kareta ne’e sei reduz tan.

“Entaun ninia total final ne’e, ha’u seidauk bele hatene, tanba diskusaun loron hira ne’e halo redusaun maka barak, ne’ebé orsamentu privativu PN 17 milhões provabelmente sei reduz tan”, relata Maria Sarmento.

Husi sorin seluk, tuir deputadu bankada PLP, Francisco de Vasconcelos, katak, atu asegura poupansa iha uma fukun PN, hanesan órgaun lejislativu, PN desidi hola kareta fazeadamente  ba deputadu sira.

“Desizaun ikus Prezidente PN hateten, avansa ho kestaun legalidade de’it no sé la sala iha loron 20 Agostu Sekretariu Jeral PN, haruka karta dala tolu ona ba eis deputadu III lejislatura ninian, maibé tama ona Outubru kareta sira ne’e la mai. Entaun Prezidente PN, Arão Noe dehan ita tau osan para hola kareta, entaun ami proponente ami hanoin, katak tanba ita koalia kona-bá poupansa, entaun ita hola fazeadamente”,haktuir Francisco de Vasconcelos.

Entretantu tuir informasaun husi Sekretariadu Jeral PN, katak entre kareta 65 ne’e iha kareta 30 maka hatama ona, deputadu sira balun uza hela, maibe kareta 35 maka seidauk hatama.

Deputadu presiza kareta

Nune’e mos, Xefi bankada PD, António da Conceição konsidera, kareta nu’udar nesesidade ida ba deputadu sira iha Parlamentu Nasionál (PN) hodi utiliza ba servisu, maibe la’os hala’o servisu tanba kareta iha.

 “Ba ha’u kareta ha’u presiza, la’os tanba ha’u nia dignidade,  maibe materia atu lori ha’u halo servisu, maibe ha’u la’os mai servisu deputadu tanba kareta ne’e, ha’u mai tanba ha’u nia mehi ba rai ida ne’e”, dehan deputadu PD ne’e, liuhosi diskusaun Orsamentu Jeral Estadu (OJE) 2019 privativu PN nian, Sesta(19/10/2018).

Deputadu opozisaun ne’e afirma tan, atu labele haree de’it ba poupansa, maibe tenke tetu mós ho kondisaun dalan sira iha territoriu Timor laran tomak, nune’e labele fó risku ba deputadu balun ne’ebé sei kontinua uza kareta tuan.

“La’os problema kareta, la’os mós tanba problema poupansa, ita tenke tau ema nia vida ba risku, ne’ebé aktu ida ne’e, aktu ida ne’ebé mak ha’u hanoin ita ema kriatura ida normal”,António akresenta, liuhosi Plenaria iha uma fukun.

Tuir eis ministru komersiu industria ne’e, Parlamentu tenke fó tratamentu ne’ebé hanesan ba deputadu hotu, maske mosu krítika, maibe tanba kondisaun Estrada ho knár fiskalizasaun ne’ebé deputadu sira tenke hala’o.

“Ha’u hanoin tratamentu ida dehan sosa ba balun, balun hein lai, atu hola ba se? kriteria saida mak ita atu uza? atu sosa uluk ba Prezidente komisoens? ita laiha  kriteriu ba buat ida ne’e, ne’e duni tratamentu ida ne’e ita tenke iha kapasidade, maske ita nia públiku ne’e bele krítika, maibe ita tenke iha kapasidade ida atu fó razaun no justifikasaun ida tanba responsabilidade ita nian”,tenik deputadu PD ne’e.

Antes ne’e, deputadu bankada FRETILIN, Antonino Bianco mós sujere, atu iha OJE 2019 fó prioridade de’it ba sosa kareta deputadu foun sira hodi fasilita ba servisu.

Enkuantu, proposta alterasaun atu sosa kareta foun 65 ba deputadu V lejislatura ne’ebé propoin husi deputadu sira passa ona, nune’e Parlamentu Nasionál iha OJE 2019 sei sosa uluk kareta ba deputadu 48 ne’ebé foun, no ba deputadu re-eleitu 17 sei kontinua uza kareta tuan to’o OJE 2020 hafoin prevé hikas atu sosa kareta foun. Ves/Say

Leave a Reply

Your email address will not be published. Required fields are marked *