TL apoia rihun US$750 ba vítima tsunami Palu

Konsellu Ministru lori povu Timor-Leste nia naran, aprova rezolusaun ida hodi espresa atitude solidariedade ba vítima tsunami sira iha Palu Sulawesi, Indonesia, ho valor orsamentu rihun US$750.

Ministru Estadu Prezidensia Konsellu Ministru, Agio Pereira, hateten, apoiu ne’e hanesan solidariedade povu Timor-Leste nian ba povu Indonesia.

“Uluk Konsellu Ministru aprova rezolusaun ida fó apoiu umanitária ba Indonesia,  agora mós lori povu Timor Leste nia naran, aprova rezolusaun ida hodi espresa atitude solidariedade ba vítima sira iha Sulawesi nian. Orsamentu ne’ebé Governu fó apoiu ne’e, nia montante rihun US$ 750”,informa Agio Pereira ba jornalista sira iha Palásiu Governu Dili, Kuarta (10/10).

Agio Pereira haktuir, ho aprovasaun ne’e, Ministériu Negosiu Estranjeiru sei komunika ba Embaixador Indonesia nian iha Timor-Leste hodi bele fó urjenti apoiu ne’e.

Iha okaziaun ne’e mós, Konsellu Ministru halo revizaun ba estatutu dekretu lei kona-ba estatutu Aeroportu Internasional.

“Tanba ita agora iha ona Aeroportu Internasional Suai, revizaun ne’e atu fó azibilidade ba dekretu lei ne’e hodi Aeroportu seluk mosu mai karik, bele Governu bele iha poder atu atribui estatutu Aeroportu internasional, tanba ida ne’e implikasaun ba imigrasaun no servisu sira seguransa nian, tanba ema mai husi rai liur tenki sai husi aeroportu internasional sira ne’e”,afirma Agio Pereira.

Rai nakdoko no tsunami sa’e iha Palu Sulawesi, Indonesia, akontese iha loron 28 fulan Setembru, hamate ema 1.500 resin.cos

Leave a Reply

Your email address will not be published. Required fields are marked *