Japaun seidauk deside konstroi Aeroportu Comoro

Embaixador Japaun ba Timor-Leste, Hiroshi Minami, hasoru malu ho Primeiru Ministru (PM), Taur Matan Ruak, hodi ko’alia kona ba Projetu Aeroportu Internasionál Prezidenti Nicolau Lobato, Comoro, Díli, ne’ebé sira seidauk bele deside atu konstroi.

 “Agora dadauk ha’u seidauk iha  desizaun husi Governu Japaun, maibé ha’u hakarak kontinua diskusaun ho Governu Timor Leste, tanba ha’u hakarak Governu Timor-Leste ho Governu Japaun konkorda ba malu”,tenik Hiroshi.

Hatan kona  ba tenderizasaun ba projetu Aeoroportu Nicolau Lobato ne’e la’o ona ka seidauk, Hiroshi, hateten, seidauk iha desizaun husi Governu Japaun.

“Ha’u hakarak tinan oin, Governu Japaun bele halo ona desizaun kona ba projetu ida ne’e”,relata Hiroshi.

Iha okaziaun ne’e mós, eis Sekretáriu Estadu Asuntu Veteranu, Marito Reis, hasoru malu ho Primeiru Ministru, Taur Matan Ruak iha Palásiu Governu.

Hafoin enkontru ho Xefi Governu ne’e durante minutu 30, Marito Reis, lakohi fó informasaun kona-ba jornalista  sira, ho razaun seidauk tempu atu fó sai informasaun ne’e ba públiku.

“Ha’u mai enkontru ho Primeiru Ministru, asuntu ko’alia kona ba veteranus nian, maibé ha’u seidauk bele ko’alia sai ba imi, to’o nia tempu mak ha’u sei ko’alia sai ba imi”,relata Marito Reis.

Antes ne’e, bainhira partisipa iha inugurasaun Ponte Comoro 3, Ministru Negósiu Estranjeiru no Kooperasaun Japaun, Taro Kono, hateten, Governu Japaun sei hahú konstrusaun projetu Aeroportu Internasional Prezidenti Nicolau Lobato, Comoro, Díli iha fulan ida ne’e.cos