Alkatiri ho Xanana laiha kontaktu dezde 2017

Prezidente Autoridade RAEOA, Marí Bim Amude Alkatiri, rekoñese katak, dezde fulan Setembru tinan 2017 la hetan kontaktu ho lider nasionál Kay Rala Xanana Gusmão, to’o ohin loron.

Durante ne’e públiku preokupa ho líder nasionál sira la tuur hamutuk atu ko’alia ba malu hodi buka solusaun ba situasuan politika rai laran.

Relasiona ho situasuan ne’e, Alkatiri husu ba líder jerasaun foun atu buka hatene no banati tuir  ezemplu di’ak husi líder jerasaun tuan sira.

“Ami líder tuan sira la fó ezemplu di’ak, maibe líder foun sira mos tenke haree lolos ezemplu di’ak sira nian mai husi ne’ebé no atu halo nusa? Ha’u ho prezidente repúblika koalia, primeiru ministru mos ha’u koalia dala hira ona, e Dr. Ramos Horta e fasil hela, e só deit kompadre Xanana mak ha’u sei hein komadre ida para atu ami na’in rua koalia”, afirma Alkatiri.

Antes ne’e liu husi debate Orsamentu Jeral Estadu (OJE) tinan 2019 iha Parlamentu Nasional (PN), deputadu Partidu Demokratiku, Mariano Asanami Sabino, hateten líder jerasaun tuan la hanorin no la hatudu buat di’ak ba jerasaun foun tanba líder jerasaun tuan la servisu hamutuk.ito