PM Taur: PR hakarak TC ho PN maka kontrola FP ■ Arão konsidera PR veta polítika ba LAP

Primeiru Ministru (PM), Taur Matan Ruak, hatete, razaun Prezidente Repúblika (PR), Francisco Guterres, ‘Lú Olo’, veta Lei atividade Fundu Petrolífera (FP), tamba tenki iha kontrola husi Tribunal de Contas (TC), Parlamentu Nasional (PN) no kontrolu Prezidente Repúblika (PR), maibe orsamentu sosa partisipasaun empreza 2 iha kampu Greater Sunrise Governu tau ona iha Orsamentu Jeral Estadu.
“Governu ninia alternativa mak tau tiha orsamentu lá hein de’it atu lei ne’e ,tamba karik lei ne’e promulga bele foti langsung iha Fundu Petrolifera hodi investe ,maibe ami hatama tiha ona OJE 2019 ne’e signifika karik ida ne’e la halo alternasaun tau iha OJE ,tamba PR ninia kestaun tenki iha kontrolu tribunal de kontas, kontrola parlamentu no kontrolu PR ,tamba ne’e pelo sim, pelo não ami preparadu ona hatama iha orsamentu”, hatete Primeiru Ministru Taur Matan Ruak ba Jornalista sira, Kuarta (12/12), iha PN, relasiona ho veta PR ba Lei Atividade Petrolíferu nebe PN halo alterasaun.
PM Taur dehan Prezidente Repúblika deklara katak, nia (PR Lú-Olo), la kontra lei atividade Fundu Petrolífera ne’e,maibe tenki tuir lei no regras ,tamba ne’e PM Taur informa ne’e dever Parlamentu Nasional ninia atu hadia ,hafoin entrega hikas fali ba Prezidente Repúblika.
“Prezidente Repúblika hatete katak, sim seño hau la kontra mas imi tenki tuir lei ,regras ne’e dever parlamentu sei estuda halo nusa para hadia depois fo fali señor Prezidente, Governu nia pozisaun konaba PR veta lei FP ne’e husik ba Parlamentu Nasional atu hare”, dehan Taur Matan Ruak.
Primeiru Ministru, Taur Matan Ruak, hatutan Prezidente Repúblika, Francisco Guterres ‘Lú Olo’, mak promulga Lei Atividade Fundu Petrolíferu, Governu bele foti orsamentu direta iha fundu petrolifera hodi investe.


PR veta polítika ba LAP
Nune’e mos, Prezidente Prezidente Parlamentu Nasional (PN) Arão de Jesus Noe konsidera desizaun Prezidente Repúblika (PR), Francisco Guterres ‘Lú Olo’ veta Lei Atividade Petrolíferu (LAP) ne’e la’os tanba konstituisional,maibé tanba kestaun polítika.

Arão konsidera, sosa asaun husi kompañia conocophillips no Shell ne’e iha ona kontratu nune’e hanesan komprimisiu ida hakarak ka lakohi tenke tau iha OJE, maibé kuando lei PR veta ida ne’e konsikuensia politika.

Maske nune’e tuir Arão, PN seidauk bele hola nia pozisaun, tanba sira sei konsentra ba diskusaun OJE, tanba tuir regimentu Parlamentu no konstituisaun hatete, PN sei halo apresiasaun ba dekretu lei ne’ebe PR veta hafoin loron 90.

“Ita lakohi perturba fila fali diskusaun OJE ne’e hein aban bain rua iha reuniaun líder bankada mak deside bainhira mak atu halo apresiasaun, ami mos simu ona karta ofisial husi PR kona ba veta lei fundu petrolíferu ne’e no hau sei konvoka reuniaun ho lider bankada sira atu informa kona-ba karta ofisial ne’e ba líder bankada sira’’,dehan Arão ba jornalista iha Parlamentu Nasional Kuarta (12/12).

Antes ne’e, PR Lú Olo deklara razaun
veta alteração lei atividade fundu petrolíferu ne’e atu evita, poltika no regras investimentu labele asesivu demais, tanba deit atividades sira, inklui mos operasoes petrolíferas ne’ebe rekere investimentu diretu husi fundu minarai.Tos/ety

Leave a Reply

Your email address will not be published. Required fields are marked *