Dom Norberto apoia TL sosa asaun Conoco-Shell

Prezidenti Konferensia Episkopal Timorense, Dom Norberto do Amaral, apoia, Timor-Leste sosa asoens Conocophilips no Shell energy, nune’e bele explora mina iha kampu Greater Sunrise.    

“Ita manan tiha ona delimitasaun fronteira ona, buat ne’ebé husi informasaun husi ekipa negosiasaun katak buat ne’e uluk la’os ita nian, maibe hafoin ita nia ekipa halo tiha negosiasaun ikus mai deside katak buat ne’e ita nia kusta, ne’ebé hakarak ka lakohi ita tenke hola tiha buat ida asoens ne’e hanesan ita nia kusta rasik”, dehan Prezidenti Komferensia Episkopal Timorense, Dom Norberto do Amaral ba JNDiario iha nia rezidensia iha Postu Administrativu Maubara, Municipiu Liquisa, Segunda (07/01/2019).

Bispo Diocese Maliana nee esplika Orsamentu Estado tinan ne’e boot, Bilaiun US$2.1 nee  tanba iha mos verba ba sosa asoens.

“Orsamentu tinan ne’e sa’e, tanba sosa ho asoens sira ne’e, ita tenke hatene asoens sira ne’e ita sosa dala ida deit, katak ba deit Orsamentu Estado tinan ne’e la’os tinan-tinan ita tau osan ba sosa asoens. Agora ita hare maka asoens sira ne’e iha benefisiu ba povu ida ne’e ka lae, maibe ba hau maka asoens sira ne’e fo benefisiu tenke hatan so que iha risku, risku ne’e hakarak ka lakohi ita moris ne’e sempre iha risku, se maka brani hasoru risku ne’e nia tauk ten, tauk ten mate iha dalan klaran hanesan povu Israel mai Ejiptu, tanba tauk ten mate iha dalan klaran, ne’e duni tenke brani hasoru risku sira ne’e”, hateten Prezidenti Komferensia Episkopal Timorense.

Asoens ne’ebé TL sosa maka 30 % husi kompanhia Conocophilips ho valor orsamentu millaun US$ 350, husi kompañia Shell 26 % ho valor osan millaun US$ 300. mia