PD preokupa Governu seidauk halo pagamentu ba projetu

Xefi bankada Partidu Demokrátiku (PD), António da Conceição senti preokupa teb-tebes ho situasaun ne’ebé maka emprezariu sira hasoru, tanba to’o agora Governu seidauk halo pagamentu ba projetu sira iha Timor-Leste, maski Prezidenti Repúblika (PR), Francisco Guterres ‘Lú Olo’ promulga tiha ona Orsamentu Jeral Estadu (OJE) 2018 no 2019.

Preokupasaun ne’e Xefi bankada PD iha Parlamentu Nasional (PN) hato’o, tanba OJE 2018 ho karakter urjensia no ho intensaun atu selu projetu ne’ebé halo tiha ona iha tinan kotuk, no liu fulan hira de’it PN aprova tan OJE 2019, maibé realidade hatudu projetu barak maka to’o agora Governu seidauk selu.

“Osan iha ona, maibé ita seidauk hatene loos razaun tanba saida maka projetu sira ne’e, to’o agora seidauk halo pagamentu, ita he’in justifikasaun ho estabelesimentu Komisaun Inkéritu Parlamentar (KIP) sei halo hela auditoria”, António da Conceição liu husi ninia deklarasaun polítika iha PN, Segunda (25-02-2019).

Nia akresenta, Xefi Estadu promulga ona OJE 2019, nune’e tenki konsiente no ezekusaun tenki la’o tuir prinsípiu efisiênsia no efikásia tenki hala’o tuir prinsípiu orsamental ho responsabilidade.

Entretantu antes ne’e, Ministru Obras Públika (MOP), Salvadór Pires deklara ona katak, Governu seidauk halo pagamentu ba projetu sira, tanba sei hein  relatóriu husi Komisaun Inkéritu Parlamentar (KIP). No kona-ba KIP nia servisu rasik hatete ona katak, seidauk bele fo sai relatóriu hirak ne’e ba públiku tanba PN seidauk diskuti iha plenária atu bele fo sai ba públiku.ety

Leave a Reply

Your email address will not be published. Required fields are marked *