Sosa asaun ConocoPhillips no Shell, PM Taur: Governu hein desizaun TR

Primeiru Ministru (PM), Taur Matan Ruak, hateten, sosa asaun ConocoPhillips no Shell Energy, Governu hein desizaun Tribunal Rekursu (TR), kona-ba fiskalizaun abstrata Lei Atividade Petrolífera (LAP).

“Ita hein oinsa mak desizaun Tribunal nian kualker formas prosesu normal ne’e lao hela diak lo’os, amenus que Tribunal hateten katak para enkuantu ida ne’e seidauk desizaun ida sai, atividade Governu nian kontinua la’o nafatin normalmente,”  Hateten, Primeiru Ministru, Taur Matan Ruak  ba Jornalista sira, Kinta (14/02/2019), hafoin enkotru ho Prezidenti Repúblika Francisco Guterres ‘Lú Olo’.

Kona-ba loron hirak mak Tribunal tenke hasai desizaun ne’e, Xefe Governu hatan katak ne’e kompetensia tomak iha Tribunal Rekursu.

Entretantu, osan ne’ebe atu sosa asaun ConocoPhilips no Shell ne’e ho montante dolar amerikanu millaun 650.

Antes ne’e mos,  partidu opozisaun iha Parlamentu Nasional bankada FRETILIN hatoo pedidu ba tribunal atu halo fiskalizaun  abstrata ba Lei Atividade Petrolífera ne’ebe parlamentu halo ona alterasaun no Prezidente Republika promulga ona.

Razaun FRETILIN husu halo fisklizasaun abstrata ne’e, tanba FRETILIN kestiona legalidade no konsekuensia husi alterasaun Lei Atividade Petrolifera (LAP).

Tanba ne’e, bankada opozisaun FRETILIN kontinua fo atensaun ba Governu atu labele ansi hodi prosesa orsamentu ne’ebe sei uza atu sosa asaun ConocoPhilips no Shell Energy iha kampu Greater Sunrise.

Nunee mos, FRETILIN defende transparénsia jestaun ba finansas públikas atu asegura utilizasaun rekursus finanseiru nasaun nian.

Opurtunidade ne’e mos, Xefe Governu ne’e garante ba Xefe Estadu ninia preokupasaun ba Ezekusaun Orsamentu Jeral Estadu ne’ebe kontinua ki’ik ba Agrikultura, Turismu Saude no Edukasaun.

“Garante ba Prezidenti Repúblika nian preoukupasaun hotu, ami regista i ami halo esforsu para bele diak liutan iha impelementasaun Orsamentu Jeral Estadu nomos prepara-an diak liutan prepara orsamentu ba tinan oin diak liutan”, promote Xefe Governu. Eus

Leave a Reply

Your email address will not be published. Required fields are marked *