Xanana lakohi komenta preokupasaun FRETILIN

Reprezentante Espesiál Governu ba Asuntu Petróleu, Kay Rala Xanana, Gusmão, lakohi fó komentáriu ba preokupasaun bankada Frente Revolucionario do Timor-Leste Independente (FRETILIN) kona-bá kapasidade Timor GAP atu jere osan sosa asaun  husi kompañia petrolífera ConocoPhillips no Shell.

Kona-bá asuntu preokupasaun bankada FRETILIN ne’e, wainhira jornalista sira tenta konfirma ho reprezentante, Kay Rala Xanana Gusmão iha Aeroportu Internasional Nicolao Lobato iha loron Sábadu (23/02), maibé nia lakohi fó komentáriu.

Preokupasaun bankada FRETILIN ninian ne’e deputada Joséfa Pereira hato’o liu husi plenária extarordinária iha Parlamentu Nasional (PN) foin lalais ne’e, kona-bá aprezentasaun polítika investimentu Fundu Petrolíferu (FP), tanba dúvida ho kapasidade Timor Gap atu jere osan USD millaun 650 ne’ebé sei uza hodi selu asaun  husi kompañia petrolífera ConocoPhillips no Shell.

Deputada Joséfa Pereira konsidera Timor Gap laiha kapasidade, atu jere  Orsamentu refere, tanba, tuir dadus hatudu katak, Estadu fó ona osan kuaze  USD Millaun 30 to’o tinan lima (5) ikus, maibé laiha rezultadu.

Antes ne’e mós, Ministra Finansas (MF) Interina, Sara Lobo Brites hateten,  investimentu ba Timor Gap, liu-liu ba operasaun Petrolífera hanesan déve, no sei fó fali retornu ba fundu  Petrolíferu ho funan.

Entretantu Governu fó konfiansa ba kompañia nasional Timor Gap maka sei jere osan sosa asaun  husi kompañia petrolífera ConocoPhillips no Shell no sei ka’er mós projetu atu dada kadoras mai Timor-Leste.Min