PM Taur lakohi espekula remodelasaun Governu

Primeiru Ministru (PM), Taur Matan Ruak, hateten kona-ba remodelasaun Oitavu Governu Konstitusional, nia parte lakohi halo espekulasaun, tanba sei iha prosesu nia laran.

Xefe Governu Taur Matan Ruak, koalia lia hirak nee ba jornalista sira, hafoin enkontru ho Prezidente Repúblika Francisco Guterres Lú Olo, iha palásiu Prezidensiál Nicolau Lobato, Bairu Pite- Dili, Kínta (4/4/2019), konaba rumores remodelasaun Oitavu Governu.

Taur Matan Ruak esplika wa’inhira akontese remodelasaun, jornalista sira mak sei hatene uluk duke nia hanesan Xefe Governu.

“Ha’u hanoin ita hein deit kuandu buat ne’e akontese naturalmente imi mak hatene uluk liu fali do que ha’u Primeiru Ministru tiha ha’u mak ikus fali, sé lae ita espekúla deit, ita soe deit buat ne’ebe ita inventa, ita espekula,” hatete Xefi Ezekutivu.

Iha okaziaun ne’e, Xefe Governu mos esplika katak Partidu Aliansa Mudansa ba Progresso-AMP, seidauk iha ajenda atu halo enkontru alargada hodi diskuti konaba remodelasaun Oitavu Governu.

“Ha’u hanoin sei halo karik ajenda sei fó sai ema hotu hatene no kuandu sai naturalmente imi informadu por-ekuantu hau sedauk hatene,” hateten, Taur Matan Ruak.

Lista membru Governu ne’ebé seidauk hetan pose mak hanesan Francisco Kalbuadi Lay, Helder Lopes, Virgílio Smith, Jacinto Rigoberto, Tomas Cabral, José Turquel, Amándio Benevides no Alfredo Pires.

Inklui mós kandidatu rua ne’ebé mak rezigna-an mak hanesan, Kay Rala Xanana Gusmão, ho António Verdiál,  nebe iha ona subtitusaun, Samuel Marsal no Longuinhos Moteiro. Eus