PN kestiona pessoal saúde HNGV diskrimina pasiente  Fó liafuan mal ba ema ho defisiente

Parlamentu Nasionál (PN), kestiona pessoal saúde ne’ebé haknár aan iha Hospital Nasionál Guido Valadares (HNGV), tanba hamosu diskriminasaun ba pasiente defisiente ho transjender sira.

Deputada bankada UDT/Frente-Mudansa, Isabel Ximenes, asesu informasaun ne’e, bainhira partisipa reuniaun meja redonda ne’ebé organiza husi IRI, ne’ebé hetan keixa husi pasiente diskriminadu sira inklui transsjender.

Reprezentante povu ne’e haktuir, bainhira pasiente inan isin rua ida ho kondisaun defisiente, no lahatene nia identidade rasik, ba halo konsulta iha HNGV, lahatene nia identidade rasik, hetan atendimentu husi pessoal saúde sira ho maneira mal, ne’ebé hateten “nusa mak matan át o tenke isin rua”.

“Ha’u hanoin maneira ne’e lamerese atu fó husi pessoal saúde ka médiku ba nia pasiente sira,” hateten Isabel Ximenes iha plenária, Tersa (02/04/2019) ne’e

Deputada Frente Mudansa ne’e, sujere ba ministra saúde atu bele toma atensaun ba asuntu refere ho sériu.

Hatán ba asuntu ne’e, Ministru Reforma Lejislativa no Asuntu Parlamentares (MRLAP), Fidelis Magalhães hateten, asuntu refere nia parte sei aprezenta iha Konsellu Ministru, nune’e bele foti medidas ba pessoal saúde refere.

“Ba pontu ida ne’e, Governu rejista ho atensaun, no sei informa ba Konsellu Ministru, tanba tratamentu diskriminativu sira ne’e labele iha fatin, iha ita-nia sosiedade. Ita tenki fó tratamentu ba ita-nia sosiedade ho dignu, ho ida ne’e ha’u sei informa ba Konsellu Minisntru atu halo chamada atensaun para ministériu saúde buka hatene kedan hodi atúa, para tratamentu diskriminativu sira ne’e laiha fatin”, afirma MRLAP ne’e.

Governante ne’e mós apela ba públiku, bainhira iha sidadaun ruma senti diskriminadu ho atendimentu públiku ka pessoal saúde ruma, bele hato’o keixa ba Governu, nune’e bele foti medidas ruma.say