Remodelasaun VIII Governu, PM Taur: Tempu badak sei halo

Tempu badak VIII Governu Konstitusionál sei halo remodelasaun ba membru Governu balun. Maske, Públiku hein hela konaba remodelasaun ne’ebé atu akontese ba membru Oitavu Governu Ativu. Maibé, Primeiru Ministru Taur Matan Ruak rezeita atu adianta uluk informasaun tanba, lakohi halo uluk espekulasaun ba asuntu remodelasaun.

“Ha’u hanoin kuandu to’o tempu halo, imi sei hatene, duke ita espekula bei-beik ema bosan tiha, ne’ebé pasiensia oituan,” dehan, PM Taur Matan Ruak ba jornalista sira, Tersa (16/04/2019), hafoin relata servisu Governu nian ba Prezidenti Repúblika, iha Palásiu Prezidensiál Nicolau Lobato, Bairu Pite-Dili.

Tuir informasaun ne’ebé JNDiário asesu katak, iha tempu badak sei halo remodelasaun ba membru Governu ne’ebé naran tama iha lista remodelasaun, ne’ebe iha Ministru rua no Sekretariu Estadu nain Hát.

Membru Oitavu Governu Konstitusionál nee simu tomada de pose iha Juñu 2018 nebe seidauk kompleta tinan ida maibe halo ona remodelasaun.

Oitavu Governu Konstitusional nee lao ain kadik hela, tanba Prezidenti Republika la fó tomada de pose ba lista membru governu nain sia nebe Primeiru Ministru Taur Matan Ruak apresenta ba.

Total lista membru governu nain sia nee, nain rua rezigna an ona no hetan ona subtituisaun no nain tolu seluk AMP rezeita atu Prezidente Republika fó tomada de posse tanba fo solidariedade ba membru governu nain sia nebe ladauk simu pose.Eus