Kareta foun ba deputadu sira, PN seidauk simu informasaun husi CNA

Parlamentu Nasionál (PN), seidauk simu informasaun husi Komisaun Nasionál Aprovizionamentu (CNA_sigla portugés) kona-ba progresu husi tenderizasaun atu sosa kareta foun ba deputadu foun sira V lejislatura nian.

“Prosesu kareta ne’e, momentu ne’eba entrega ba CNA, tanba tuir dekretu lei hateten katak, ba projetu ka kompras buat ruma ne’ebé liu husi USD1 millaun, CNA mak tenki halo prosesu tenderizasaun, maibé to’o agora ami seidauk simu informasaun ruma husi CAN, kona-ba prosesu tender ne’e, kompañia ne’ebé mak manan, ami seidauk iha informasaun, ita hein to’o iha semana ida ne’e nia laran, tanba nato’on sira (CNA) loke tender to’o dia 16 de Maiu ne’e, bele iha rezultadu, maibé kompañia ruma manan ona ka la’e, depende ba CNA nia desizaun”, informa Prezidente PN, Arão Noe Amaral ba jornalista sira iha PN, Sesta (17/05/2019).

Arão Noe haktuir, Parlamentu Nasional la define marka kareta ne’ebé planu atu sosa ba deputadu foun, maibé importante iha trasaun no gazoel.

“Konsellu Administrasaun la define marka kareta, Konsellu Administrasaun so define de’it tipu kareta ne’ebé iha trasaun, bulante iha direita, uza gazoel no manual, maibé modelu kareta ami la deside, tanba osan USD 41 mil, lato’o para atu sosa prado, tanba prado nia folin USD 60 e tal mil, tanba ne’e kualker kareta ne’ebé hetan, importante ho espesífika hat ne’ebé ohin temi ne’e”, subliña líder másimu V lejislatura ne’e.

Antes ne’e, iha diskusaun orsmentu jerál Estadu tinan 2019 nian, deputadu sira bankada Fretilin, sujere, Parlamentu Nasionál sosa kareta ho marka Pajero Sport, ne’ebé ho folin kuaze USD 40 mil, kompara ho kareta prado ne’ebé ho folin kuaze USD 60 mil.

Kona-ba prosesu kareta prado ne’ebé eis deputadu III lejislatura utiliza, Prezidente Parlamentu Nasionál haruka ona polémika refere ba ministériu públiku, nune’e solusiona tuir dalan justisa nian.say