Troka Alkatiri husi RAEOA, PM Taur: Ami sei diskuti hodi deside

Oitavu Governu Konstitusional sei diskuti figura ne’ebé bele troka Marí Alkatiri hodi lidera Regiaun Administrativa Espesial Oecusse – Ambeno (RAEOA) no Zona Espesial Ekonomia Sosial Merkadu (ZEESM).

Xefe Governu Taur Matan Ruak, hato’o lia hirak ne’e hafoin enkotru semanal ho Prezidenti Repúblika Francisco Guterres Lú Olo, iha Palásiu Prezidensiál Nicolau Lobato, Bairu Pite – Díli, Kinta (09/05/2019).

“Asuntu ne’e avansa ba públiku no lori tempu ami sei diskuti tó momentu sertu  lolos imi sei hatene desizaun saida mak Governu sei toma, sei kontinua ka, troka, sé troka sé mak troka momentu propriu ita bo’ot sira hatene,”dehan Taur Matan Ruak.

Maski to’o ohin loron governu seidauk hetan figura ne’ebé mak atu troka Prezidente Autoridade Marí Alkatiri hodi lidera Rejiaun Administrativa Espesiál Oecusse-Ambeno (RAEO-A) no Zona Espesiál Ekonomia Sosiál Merkadu (ZEESM), maibe  atu troka Marí Alkatiri Governu sei diskuti antes desidi sé mak bele troka.

Antes ne’e,  Xefe Estadu Francisco Guterres Lú Olo mos hatat ona katak figura ne’ebé atu lidera RAEOA – ZEESM ema ne’ebé tenke iha kapasidade.

Mari Alkatiri hetan fiar husi Estadu Timor Leste hodi lidera ZEESM-RAEOA  no hetan posse iha fulan Jullu, tinan 2014,  husi eis Prezidente Repúblika  atual Primeiru Ministru Taur Matan Ruak.

No mandatu  Marí Alkariti sei termina iha fulan Jullu tinan ne’e, maibe lider historiku nee mos hatete ona nia sei entrega kargu autoridade ba Primeiru Ministru nee iha fulan Maiu, molok mandate termina . Eus