CNRT husu PN fiskaliza millaun USD 70 iha tempu VII governu

Deputadu bankada CNRT, iha Parlamentu Nasionál (PN), husu Meza PN atu hari’i komisaun inkéritu hodi fiskaliza osan millaun USD 70 ne’ebé VII Governu halo levantamentu, tanba CNRT konsidera, levantamentu refere latuir regras, no la liu husi Parlamentu Nasional.

“FRETILIN halo violasaun grave hasoru lei Fundu Petrolíferu, tanba foti osan USD 70 milhões sem liu husi Parlamentu Nasional. VII Governu halo transferénsia USD 70 milhões husi Fundu Petrolíferu iha fulan Maiu 2018, la liu husi Parlamentu Nasional, tuir artigu 8, Lei Fundu Petrolíferu hateten, atu halo  transferénsia husi Fundu Petrolíferu, tenki hetan autorizasaun husi Parlamentu Nasional, maibé IV lejislatura laiha koñesimentu ba tranferénsia ida ne’e. Prosesu levantamentu Fundu Petrolíferu ne’ebé mak la mai iha Parlamentu Nasional sei difikulta ami atu halo fiskalizasaun, tanba “tuir informasaun” tansferénsia ne’e VII Governu halo de’it ho Banku Sentral Timor-Leste”, hateten deputadu CNRT, Oscar de Araújo iha plenária PN, Segunda (10/06/2019).

CNRT konsidera, aktu VII Governu nian, kontra lei fundu petrolíferu no husik presedente ladi’ak ba jerasaun foun.

“Ami haree katak, aktu ida ne’e kontra Lei Fundu Petrolíferu no sei husik presedente ladiak ba futuru, tanba ita hahú estraga ona espíritu de Lei Fundo Petrolíferu atu rigor iha kontrollu de uzu, proteje fundu soberanu ida ne’e hodi garante ninia jestaun sensatez, transparante no akuntabilidade, atu nune’e fó benefísiu ba jerasaun atuál no jerasaun futuru, tanba Fundu Petrolíferu tenki sai instrumentu hodi kontribui ba iha boa polítika fiskal hodi konsidera devidamente ba interesses longu prazu sidadaun Timor-Leste”, tenik Deputadu CNRT ne’e.

Hatán pedidu ne’e, deputadu bankada FRETILIN, Antoninho Bianco dezafia bankada CNRT ho AMP atu harii komisaun inkéritu ne’e iha tempu agora kedan hodi nune’e, bele halo fiskalizasaun ba prosesu levantamentu fundu petrolíferu.say