JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

FRETILIN husu Kalbuadi labele reprezenta TL ba Dubai

FRETILIN husu Kalbuadi labele reprezenta TL ba Dubai

Vise Xefe bankada Frente Revolusionariu Timor-Leste Independensia (FRETILIN) deputadu Francisco Miranda Branco konsidera, deputadu CNRT Francisco Kalbuadi Lay seidauk bele reprezenta Timor-Leste (TL) ba tuir expozisaun iha Dubai, tanba iha hela prosesu justisa nia laran.

“Husu deputadu Francisco Kalbuadi Lay atu koopera ho justisa, hodi ba rasik iha ministériu públiku hodi halo investigasaun ba alegasaun brankeamentu kapital. Kalbuadi ne’ebé nia funsaun hanesan deputadu iha PN, ne’ebé hetan fiar husi Governu atu sai autoridade ba iha expo Dubai, ami iha issu rona katak, deputadu Kalbuadi hetan medida koasaun TIR husi ministériu públiku. Tanba ne’e, ami presiza hetan esklaresimentu husi Governu, tanba ami senti ladi’ak, kunadu ita-nia autoridade ne’ebé reprezenta Estadu Timor-Leste iha expo ne’ebé internasionál iha Dubai”, kestiona Francisco Branco iha Parlamentu Nasionál, Tersa (25/06/2019).

Deputadu opozisaun ne’e konsidera, bainhira eis ministru turizmu ne’e reprezenta Timor-Leste, sei hamonu dignidade Estadu nian, tanba deputadu refere sei iha prosesu investigasaun.

“Iha hela investigasaun nia laran, ne’ebé hetan ona TIR husi ministériu públiku, ne’ebé atu reprezenta Estadu iha eventu ida bo’ot mundial ne’e iha Dubai, oinsa dignidade Estadu ho ita-nia reprezentante ida ne’ebé iha problema ho justisa, depois iha alegasaun ba krime brankamentu kapital. Ami preokupa, reprezentante povu iha uma fukun Parlamentu Nasionál, hakarak hatene ka hetan esklaresimentu ba nomeasaun ida ne’e, nomeasaun ema ne’ebé iha problema ho justisa”, subliña Branco.

Hatán ba asuntu ne’e, Xefe bankada CNRT, Duarte Nunes konsidera, akuzasaun FRETILIN nian ne’e falsu no laloos, tanba durante ne’e, laiha Termu Identidade Rezidensia (TIR) ruma ba deputadu Kalbuadi Lay.

“Sekretáriu jerál CNRT, momentu nia sei hanesan deputadu, nia ba ona ministériu públiku hodi aprezenta aan voluntariamente, hodi fó ona informasaun ba ministériu públiku, husu ona atu kontinua nia prosesu ba Tribunal, tanba ne’e mak nia momentu sei hanesan deputadu mós la presiza atu hasai nia imunidade, maibé dehan nia TIR ha’u lahatene, keta deputadu FRETILIN sira mak halo justisa, halo desizaun ka husi partidu mak halo desizaun hodi hetan TIR, ha’u lahatene. Kuandu Governu hola desizaun haruka nia ba ne’e, signifika hatene nia estatus ne’e mak haruka nia ba, hodi reprezenta nasaun atu halo servisu ne’e, ita deskonfia malu ne’e bele, maibé akuza malu ne’e, signifika ita sei rai odíu ba malu, ida ne’e situasaun sei la la’o iha ita-nia rain”, esklarese Xefe bankada CNRT ne’e.

Lee hotu :   URGENTE - NOVO GOVERNO

Hatán ba preokupasaun ne’e, Ministru Reforma Lejislativa no Asuntu Parlamentares, Fidelis Magalhães klarifika, Governu deside sekretáriu jerál CNRT, Francisco Kalbuadi Lay, tanba nu’udar Timor oan ne’ebé iha ona esperiensia hodi organiza eventu iha área hanesan ne’e.

Fidelis mós afirma, Governu nomeia pessoal ne’e nu’udar komisaun organizadora, tanba konsidera Timor-oan ne’e laiha problema ruma ho parte justisa.

“Governu nomeia Francisco Kalbuadi Lay hodi tau matan ba autoridade ne’ebé mak lori Timor-Leste nu’udar reprezentante Governu nian ba iha expo ida iha Dubai ba tinan 2020-2021, tanba  antes ne’e Fracisco Kalbuadi Lay iha ona esperiensia iha área ida ne’e, se ita lembra, iha expo ida iha Milaun iha 2015, mós hanesan ho agora ne’e”, relata Fidelis.

Tanba ne’e, Fidelis esplika, Governu hatene katak, Timor-oan ida ne’ebé di’ak liu no kualifikadu liu ba kna’ar ida ne’e mak deputadu Francisco Kalbuadi Lay, hodi hala’o kna’ar hanesan Governu nia reprezentante ida ne’ebé mak tau matan ka kaer autoridade nasionál ba asuntu expo iha Dubai ne’e, tanba Governu hatene katak, Kalbuadi Lay laiha problema ho justisa.

Expozisaun mundial ne’e, sei realiza iha Dubai, iha tinan 2020 to’o 2021.say

Add to Comments Here!!!!

error: Content is protected.
Secured By miniOrange
You might also like:
Asuntu abandona família pasiente iha Hospital Siloam Surabaya, PN sei konfirma MS

Prezidente Komisaun F Parlamentu Nasionál (PN)...

Filomeno Paixão: Lista kobransa ilegál submete ona ba CAC ■ Karimbu ida folin USD 400

Ministru Defeza no Interior Interinu, Filomeno...

PM Taur sofre moras estómagu inflamasaun

Vise Ministru Saúde, Bonifacio Maukoli dos...

Close