Maioria deputadu ba Oecusse, meja PN kansela reuniaun plenária

Primeiru Vise Prezidenti Parlamentu Nasional (PN), Maria Angelina Sarmento hateten, meja PN desidi  kansela reuniaun plenária, tanba maioria deputadu sira viajen ba Rejiaun Administrativa Espesial Oe-Cusse Ambeno (RAEOA), hodi  partisipa serimonia inaugurasaun ba aeroportu Rota de Sândalo.

Tuir loloos ajenda PN halo plenária ne’e kada semana iha Segunda no Tersa, maibé iha segunda, loron 17, fulan Juñu ne’e, deputadu sira la priense quórum, nune’e PN labele realiza plenária.

“Ohin (Horiseik) iha duni ajenda ba plenária, maioria deputadu sira hotu dezloka ba RAEOA, ita hatene ba RAEOA ne’e tenki liu iha fronteira no liu husi prosesu ne’ebé naruk, ba tratamentu dokumentu, nune’e deputadu sira tenki desloka antes”, Primeiru Vise Prezidenti PN iha PN, Segunda (17-06-2019).

Nia esplika, PN labele halo plenária, tanba bainhira atu halo plenária deputadu 23 tenki marka prezensa, maibé iha Segunda (horiseik-red) ne’e prezensa deputadu sira iha na’in 19 de’it.

“Deputadu sira halo viazen ba munisípiu ne’e relasiona ho atu partisipa iha serimonia inagurasaun aeroportu Rota de Sándalo iha RAEOA no partisipa iha semináriu kona-bá boa governasaun”, haktuir Maria Sarmento.

Entretantu tuir planu PN sei halo plenária iha semana oin, bainhira deputadu sira fila husi Rejiaun Administrativa Espesial Oe-Cusse Ambeno (RAEOA). ety