PPN Arão Noe: Sidadaun Timor ho defisiénsia labele senti marjinalizadu

Prezidente Parlamentu Nasionál, Arão Noe de Jesus Amaral, hateten,  sidadaun Timor ne’ebé ho kondisaun defisiénsia labele sente marjinalizadu iha rai ida ne’e. 

Xe orgaun Lejislativa hato’o lia hirak ne’e hafoin partisipa hodi abertura semináriu nasionál ne’ebé organiza husi Assosiassão Defisiénsia Timor-Leste (ADTL) iha Salaun Ministériu Solidaridade Sosiál, Kinta (13/06).

Lider másimu segundu órgaun soberanu ne’e hateten, konstituisaun Repúblika Demokratika Timor-Leste (KRDTL) garante sidadaun hotu-hotu nia direitu no tratamentu hanesan.

“Hau husu para defisiénsia sira labele sente katak marjinalizadu iha Estadu ida ne’e, tanba ita nian konstituisaun garante ema hotu-hotu nian direitu, tratamentu hanesan, iha Timor la hare ba kor. Konaba ratifikasaun konvensaun direitu ba ema difisiensia sira nian, ne’e politika no inisiativa liga ba ministeriu ne’ebe relevante no parlamentu hein ratifika”, hateten Prezidente PN, Arão Noe De Jesus Amaral.

Diretúr Ezekutivu Associação Defisiénsia Timor-Leste (ADTL), Cesário da Silva husu parlamentu no governu tenke haree ratifika ona konvensaun ONU protesaun direitu ema ho difisiensia.

“Ema ho defisiénsia hasoru problema bareira bo’ot liu ne’e ambiental, koalia konaba asesibilidade fiziku sira , por ezemplu edifisiu públiku sira asesu deit ba ema sira la’os defisiénsia, no asesu transporte públiku sira mos, ema ho defisiénsia labele asesu hanesan ho ema babain,” hateten Diretúr Ezekutivu ADTL, Cesario Da Silva.

Semináriu nasionál konabá alkansa ajenda 2030 durante loron ida iha salaun ministériu solidaridade sosial ne’e ho tema la husik ema ida iha kotuk liu husi planeamentu no orsamentu inkluzivu ba ema ho difisiensia. Ito