TL Estadu unitáriu, Governu sentral iha devér akompaña dezenvolvimentu RAEOA

Ministru Reforma Lejislativa no Asuntu Parlamentár (MRLAP), Fidelis Manuel Leite Magalhães, hateten, Timor-Leste (TL) nu’udar Estadu unitáriu, tanba ne’e Governu sentral iha devér atu akompaña dezenvolvimentu iha Região Administrativa Especial de Oecusse Ambeno (RAEOA). 

Fidelis Manuel Leite Magalhães hateten kestaun ne’e hafoin núdar reprezentante oitavu governu konstitusionál ne’ebé prezensa iha sesaun plenária Parlamentu Nasionál, Tersa (04/06/2019).

Relasiona ho autoridade Região Administrativa Especial de Oecusse Ambeno ne’ebé to’o agora ladauk fó resposta karta vizita traballu husi Ministra Edukasaun Juventude no Desportu (MEJD), Dulce de Jesus Soares atu haree besik liu tan kona-bá dezenvolvementu edukasaun iha RAEOA,  liuliu liga ho asaun greve husi sindikatu profesor sira tanba seidauk simu osan retroativu no saláriu mensal durante fulan barak.

Reprezentante oitavu governu Ministru Reforma Lejislativa no Asuntu Parlamentár, Fidelis Manuel Leite Magalhães liu tan katak, prezidente autoridade tutela ba Primeiru Ministru, tanba ne’e Governu sentral iha dever atu akompaña dezenvolvementu iha RAEOA nomós iha teritoriu laran tomak.

“Timor-Leste ne’e Estadu unitáriu ka Estadu ida deit, prezidente autoridade ne’e tutela ba primeiru ministru nia okos, ne’ebé governu sentral ne’e autoridade ba teritóriu tomak. Ita sei haree estebelesimentu lei ne’ebé harii ka hatúr iha RAEOA ne’e temi kona-ba knaar no kompetensia RAEOA nian, no konstituisaun lei sira mos estipula knaar governu sentral nian, maibe governu sentral iha dever atu akompaña dezenvolvementu iha teritóriu laran tomak”,hateten MRLAP, Fidelis Manuel Leite Magalhães.

“Entaun Ministra bele dezloka ba iha RAEOA, ne’ebé agora kabe ba Ministra haree ba tempu bele dezloka ona ba iha ne’ebá, tanba Ministra mos subordina husi Primeiru Ministru, no prinsipalmente ami nian preokupasaun mak Ministra tenke dezloka ba Oecusse atu haré no responde ezijensia no preokupasaun ba ita ninian profesór sira,”hateten Prezidente Komisaun G PN, deputada Albina Marçal Freitas.  

Antes ne’e mós sosiedade sivil no akadémiku sira fo sai nia deklarasaun katak governu sentral iha kompetensia másima atu avalia servisu tomak iha RAEOA no munisípiu sira seluk.Ito