KHUNTO-PLP apresia Xanana nia luta ba FM  PN la’os AMP nian

Bankada Kmanek Haburas Unidade Nasionál Timor-Oan (KHUNTO), ho bankada Partidu Libertasaun Popular (PLP), iha Parlamentu Nasionál (PN), apresia Xefe Negosiador Fronteira Marítima (FM), Kay Rala Xanana Gusmão nia luta durante ne’e, to’o  manan soberania fronteira tasi ho nasaun bo’ot hanesan Australia.

“Apresia no orgullu tebes ba intervensaun sira husi governu, ne’ebé durante ne’e aprezenta, tanba intervensaun sira mesak furak no klean tebes. Kongratula ho respeitu klean mós ba maun bo’ot Kay Rala Xanana Gusmão, tanba maun bo’ot ho nia ekipa nia luta mak ita bele manan ita-nia FM”, afirma deputadu bankada KHUNTO, António Verdial iha PN, foin lalais ne’e.

Alende ne’e, Vise Xefe bankada PLP, Francisco de Vasconçelhos mós, sujere ba bankada opozisaun sira iha Parlamentu Nasionál, atu bele fó apoiu tomak ba ratifikasaun Fronteira tasi Timor ho Australia, nu’udar soberania TL nian, ne’ebé sei lori benefísiu ba povu hotu.

“Orgullu bo’ot ba sira ne’ebé defende soberania Timor nian, tanba ne’e, husu povu Teste-Leste (TL) kontinua fó fiar ba Parlamentu Nasionál (PN), hodi defende soberanu TL nian, liu-liu FM inklui mós riku no soin ne’ebé sei lori dezenvolvimentu ba TL. Kontinua husu nafatin ba bankada opozisaun sira, la’os mai de’it ho pozisaun polítika, ka deklarasaun polítika hodi kontra soberania TL, ita hotu luta sakrifika povu, ita rasik mós nu’udar autór ida ba independensia ida ne’e, tanba ne’e, ita hotu mai iha ne’e, komprometidu hodi defende soberania TL nian, liu husi tratadu ne’ebé ita  atu ratifika iha parlamentu ida ne’e”, afirma Vasconçelhos.

Iha biban hanesan, deputadu bankada FRETILIN, Antónino Bianco hateten, PN la’os bankada AMP nian de’it, tanba ne’e, labele uza de’it forsa maioria atu halo mudansa ba buat hotu, tuir AMP nia hakarak.

Entretantu, akordu ba delimitasaun fronteira tasi Timor ho Australia ne’e, asina ona iha loron 06 fulan Marsu tinan 2018, iha Nova Iorque, no governu Timor-Leste ho governu Australia, iha ona konkordansia, atu halo ratifikasaun ba tratadu ne’e, iha loron ne’ebé hanesan, mak loron 30, fulan Agostu, tinan 2019 ne’e, iha ámbitu Timor-Leste komemora nia loron konsulta populár ba dala 20.say