Komisaun 3 diskute ona pakote alterasaun lei FM iha espesialidade

Hafoin aprova pakote alterasaun lei sira ne’ebé atu ajusta ba ratifikasaun Fronteira Marítima (FM) iha Kinta (18/07),  iha Sesta (19/07), komisaun espesializada  tolu hanesan B,C no D PN, tama kedas ba diskusaun iha faze espesialidade nian.

Prezidente komisaun C, ne’ebé trata asuntu finansa públika, deputada Fernanda Lay informa, iha parte dader nian, komisaun konsege diskute ona lei kona-ba fundu petrolíferu, no sei kontinua diskute mós lei kona-ba estabilidade tributária nian.

“Hakarak ka lakohi TL mós tenki harmoniza nia lei sira, atu nune’e, osan ne’ebé tuir loloos desde 3 de Marsu 2018 tama mai iha kofre Estadu, bele mai lalais ita, tanba ita atraza ona kuaze tinan resin, hanesan Xanana hateten iha diskusaun faze jeneralidade no mós audiensia”, relata deputada CNRT ba jornalista iha PN, Sesta (19/07).

Reprezentante povu ne’e salienta, alterasaun ba pakote lejislasaun sira ne’e, importante atu nune’e, Timor-Leste bele hetan nia direitu tomak, inklui Timor-oan hirak ne’ebé servisu iha tasi Timor mós bele hetan direitu hanesan ho traballadór internasional sira.

“Lei tributária mós presiza harmoniza, tanba uluk ita simu de’it mak nia royalties, maibé agora iha impostu seluk ne’ebé TL bele kobre, no ita tenki iha lei duni, hanesan iha tratadu tasi Timor iha lei balun mak kaduka, tanba iha lejislasaun ida ne’e ita labele husik hela, tanba ne’e mak TL hakarak ka lakohi tenki altera lei 4 ne’e, no Australia rasik iha lei 25. Hanesan Xanana hatete, osan ne’ebé ita lakon USD 5 milloens fulan-fulan, ida ne’e bele tama direitamente mai ita nia kofre Estadu.

Alende ne’e, ita-nia funsionáriu ne’ebé servisu iha tasi Timor, ho alterasaun ne’e, sira sei hetan benefísiu hanesan ho traballador estranjeiru, inklui taxas ho impostu ne’ebé sai direitu TL ninian”, tenik Fernanda Lay.

Pakote lejislasaun ne’e aprova ona iha faze jeneralidade, no Lei númeru 5/V primeira alterasaun lei fundu petrolíferu, pasa ho votus a favor 40, kontra 23 no abstensaun 1, inklui lei númeru 6/V primeira alterasaun lei tributaria pasa ho votus a favor 41,  kontra 23 no abstensaun 0, inklui rejimi laboral migratóriu pasa ho votus a favor 41, kontra 0 no abstensaun 0, nune’e mós lei atividade fundu petrolíferu pasa ho votus a favor 40, kontra 23 no abstensaun 1.say