PM Taur: Governu la estende mandatu Alkatiri iha RAEOA

Governu  daualu ne’ebé lidera husi Primeiru Ministru (PM), Taur Matan Ruak, hakerek ona karta ida ba Prezidente Repúblika, Francisco Guterres ‘Lú Olo’, katak, Governu sei la halo estensaun ba mandatu Marí Alkatiri nu’udar Prezidente Rejiaun Administrativa Espesial Oé-cusse Ambeno (RAEOA).

“Señor  dotor Marí Alkatiri hakerek karta ida mai ha’u iha 15 fulan  Jullu ne’e, hateten nia mandatu iha 31  Jullu remata.  Ha’u mós hakerek karta ida ba exelensia Prezidente Repúblika,  Francisco Guterres ‘Lú Olo’ katak, laiha intensaun atu halo  extensaun mandatu ba señor Mari Alkatiri”,esplika PM  Taur Matan Ruak, ba jornalista sira Kinta (18/07/19), hafoin enkontru semanal ho Prezidente Repúblika, iha Palásiu Prezidensial Bairro-Pite Díli.

Alende ne’e, PR Lú Olo, antes ne’e mós  simu lei alterasaun husi Parlamentu Nasionál kona-ba RAEOA. Tanba  ne’e governu  hein pasu mai oin ne’e saida.

Nune’e mós  Governu konsidera preokupasaun komunidade Atoni Oé-cusse, ne’ebé mak la konkorda alterasaun lei husi Parlamentu Nasionál kona-ba RAEOA.

“Ami rejista sira-nia preokupasaun hotu naturalmente, desizaun ne’e  ita   hatene orgaun soberania sira mak sei desidi”,dehan Taur Matan Ruak.

Maske governu la halo estensaun ba mandatu Prezidente RAEOA Mari Alkatiri iha Oé-cusse, maibe dadauk ne’e, governu seidauk fihir figura ida lolós atu troka Mari Alkatiri iha Oé-cusse.

Entretantu mandatu Prezidente RAEOA, Marí Alkatiri, sei remata iha loron 30, fulan jullu, tinan ne’e.avi