Alterasaun lei RAEOA Inkonstitusional, Tribunal Rekursu notifika PN

Tribunal Rekursu konsidera aleterasaun lei Rejiaun Administrativa Espesial Oé-Cusse-Ambeno (RAEOA)  numeru 3/2014, artigu 19 no 21 nee Inkonstitusional, tanba nee haruka karta notifikasaun ba Parlamentu Nasionál (PN).

 “Ami simu karta notifikasaun ida husi Tribunal Rekursu mai PN iha 31 fulan Jullu ne’e, ne’ebé ho urjentimente atu resposta fila fali karta ne’e, tanba ne’e, ami fó hatene ona ba ami nia asesor sira, hodi prepara hodi fó resposta ba notifikasaun ne’e”, informa segundu Vise Prezidente PN, Luis Roberto ba jornalista iha PN, Sesta(02/08/2019).

Luis Roberto esplika, Tribunal notifika Parlamentu nasionál, tanba konsidera alterasaun lei RAEOA iha artigu 19 no 21 ne’e viola konstituisaun RDTL artigu 71.

 “Iha notifikasaun ne’e hateten katak, bazeia ba artigu 71 K-RDTL katak, dehan alterasaun lei ne’e inkonstitusional, tanba ne’e mak Prezidente Repúblika haruka fali lei ne’e ba Tribunal, depois tribunal haruka notifikasaun mai PN, maibé karta notifikasaun ne’e ami prepara hela resposta, Segunda loron 5 fulan Jullu ne’e sei haruka hikas ba Tribunal”, tenik Roberto.

Luis Roberto haktuir, maske hetan notifikasaun, maibé Parlamentu Nasional halo alterasaun lei ne’e bazeia ba regras ne’ebé konsidera la viola lei ruma.

“Alterasaun lei ne’e la kontra konstituisaun, ita hatene katak lei ne’e la’os atu permanente, alterasaun mós la’os atu muda lei hotu-hotu lae, maibé bainhira iha lakunas ruma presiza hadia’k, ita tenki hadia, buat hotu bazeia ba legalidade, tanba ne’e la kontra lei”, subliña Segundu Vise PPN ne’e.

Iha artigu 71 konstituisaun RDTL alinea 1 hateten, Governu sentrál tenki iha reprezentasaun husi nível eskalaun administrativa oin-oin iha rai-laran.

No iha alinea 2 mós hateten, Oe-cusse Ambenu sei hala’o nia kna’ar tuir polítika administrativa ho rejime ekonómiku espesiál.

Entretantu, lei nú 3/2014 ne’ebé ko’alia kona-ba estabelesimentu RAEOA-ZEESM ne’e, Parlamentu Nasionál kinta lejislatura altera ona artigu 19 no 21 ne’ebé ko’alia kona-ba kompetensia nomeia no ezonera Prezidente RAEOA-ZEESM.

Alterasaun ne’e rasik, passa ho votus maioria parlamentar afavor 34 kontra 0 no abstensaun 0, no PN haruka ona ba Prezidente Repúblika iha loron 10 fulan Jullu ne’e, maibé Prezidente Repúblika haruka hikas ba Tribunal atu haree nia legalidade.say