JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Deskonfia PR fó pose ba embaixador nain tolu apoiante FRETILIN ■AJAR: Sei hamosu dezastre polítika iha TL

Deskonfia PR fó pose ba embaixador nain tolu apoiante FRETILIN ■AJAR: Sei hamosu dezastre polítika iha TL

Sosiedade Sivíl sira deskonfia Prezidente Repúblika (PR), Francisco Guterres Lú Olo, fó posse ba embaixador Timor-oan na’in tolu ne’ebé atu reprezenta Estadu ba nasaun Estadu Unidu Amérika, Nova Zelandia no Brazil, tanba koor partidu FRETILIN.

Diretur Asia Justice And Rigth (AJAR), José Luis Oliveira, hatete, embaixador nain tolu  ne’ebé simu pose husi Prezidente Repúblika, Francisco Guterres Lú Olo, tanba koor partidu hanesan, sei hamosu dezastre polítika iha Timor-Leste.

“Kona ba ida ne’e, tenki ba husu didiak Prezidenti Repúblika nia razaun saida mak fó posse ba embaixador nain tolu ne’e, se tanba deit  sira nain tolu partidu polítiku, no la fó posse  ba sira seluk, ha’u hanoin ne’e ita kontinua ho dezastre ba ita-nia polítika no halo ita-nia figura iha mundu internasional  mós ladun di’ak”, dehan Luis Oliveira ba Jornalista GMN Kuarta (14/08/2019) iha Farol Díli.

Nia salienta, depois tinan 20, buat ne’ebé uluk ema admiradu ba TL mak unidade nasional, maibé ikus ne’e lideransa sira hatudu fali ba ema katak, tau interese Estadu mak ne’ebé? partikular mak ne’ebé? individu mak ne’ebé? La klaru.

“Mai ha’u ne’e tristeza bo’ot ida, liu-liu buat sira ne’e halo husi ita-nia lider 75 sira, no jerasaun foun sira bainhra substitui polítiku sira tuan,  keta halo ba sira halo pior liu karik, maske ita iha diferensa polítika, maibé ita tenki tau interese Estadu iha leten”, relata José José Oliveira.

Maibé Diretur AJAR ne’e akresenta, kuandu seidauk hatene razaun Xefe Estadu nian hodi fó posse ba embaixador na’in tolu ne’e,  labele julga uluk.

“Maibé bainhira  haree ba akontesimentnu ne’e, senti triste ba atitude partidu polítiku nian la hanorin buat ruma ké diak ba jerasaun foun sira. Husi ita-nia  diferensa ideia, ita sakrifika ita-nia Estadu, ita-nia Estadu tenki iha embaixador sira,  sei laiha, ita tenki halo diálogu buka solusaun hodi troka ida ne’e, no labele nonok de’it hodi blokeia malu,  tanba tuir los lideransa sira ne’e tenki hatudu buat diak ba ita”, katak José Oliveira.

PN husu PR troka embaixador enkaregadu sira

Primeira Vise Prezidente Parlamentu Nasionál (PN), Maria Angelina Sarmento, husu Prezidente Repúblika (PR), atu fó posse ona ba kandidatu embaixador pendente sira, hodi subtitui embaixador sira ne’ebé kontinua enkaregadu, hodi fó imapktu ba prosesu adere ba ASEAN,  tanba embaixador sira enkaregadu ho tempu naruk, hamosu dúvidas ba nasaun membru ASEAN sira seluk katak, Timor-Leste (TL) laiha rekursu ne’ebé ho kapasidade.

Lee hotu :   Xanana la aseita dezeñu monumentu 12 Novembru "Komité propoin tan US$ 1,5 millaun"

“Lista ne’ebé mak tama ba Prezidente Repúblika, lista ne’e dada to’o agora, impasse polítika ba membru governu ne’e dinámika iha ita-nia rai laran de’it, ne’e la problema, ita bele dehan ne’e preokupasaun ida hotu, ne’ebé mak Prezidente Repúblika dada kleur tebes, atu fó posse ba ema na’in 9 ne’e, maibé namdigas ita hakarak halo tan buat ne’ebé mak hanesan ba ita-nia embaixador sira. Embaixador sira ne’e la’os reprezenta partidu ida ne’ebé mak manan ninia imajen, maibé embaixador sira ne’e reprezenta Estadu Timor-Leste, ne’ebé reprezenta PR, PN, Governu no Tribunal inklui iha estranjeiru ne’eba, sei Prezidente halo bebeik ida ne’e, ita hanesan halimar demais ho ita-nia Estadu ida ne’e, tanba embaixador sira presiza hala’o sira-nia kna’ar, atu bele hametin no reforsa relasoens diplomatas internasional ne’ebé mak ita iha, nune’e ema bele haree katak, maske Timor-Leste país ida ne’ebé ki’ik no foun, maibé ita mós priense duni rekezitus ida, Estadu soberanu ida iha nasaun seluk nia matan”, hateten Maria Angelina Sarmento ba jornalista iha PN, Kuarta (14/08/2019).

Maria Angelina afirma, maioria embaixador mak mandatu remata ona, hodi kontinua asume hela kna’ar nu’udar embaixador enkaregadu.

Tanba ne’e, nia sujere ba Xefe Estadu atu priense lalais, hodi kuida mós imajen di’ak Estadu Timor-Leste nian.

“Maioria embaixador sira ne’ebé iha ita-nia embaixada sira no konsul sira iha liur, ne’e agora diplomatas kareira sira mak sai enkaregadu hela, enkaregadu ne’e normalmente fulan ida to’o tolu de’it, maibé kuandu liu ne’e ladi’ak ona, ne’e hanesan impresaun públiku, liu-liu ema estranjeiru nian, iha país sira ne’ebé mak ita agora enkaregadu hela, sira-nia impresaun mai ita-nia Estadu Timor-Leste ne’e ladi’ak, tanba ita país ida ne’ebé iha ita nia soberania rasik, ita presiza responde lalais ba mandatu sira ne’ebé mak emvaga hela, nune’e ita priense kedas, tanba embaixador ka konsoladu enkaregadu ho tempu ida naruk tebes, ne’e ita bele hatudu ba ema katak, ita laiha kapasidade, ita laiha rekursu humanu ne’ebé sufisiente, hodi bele priense, embaixador sira ne’ebé mak mandatu remata tiha ona”, tenik Primeira Vise PN ne’e.

Lee hotu :   TL adere ba ASEAN, hein desizaun husi nasaun 10

Deputada bankada PLP ne’e  konsidera Xefe Estadu halimar ho situasaun, tanba fó posse de’it ba embaixador tolu ne’ebé deskonfia iha koneksaun ho partidu polítiku balun.

 “Ami preokupa tebes, tanba Prezidente Repúblika halimar nafatin ho situasaun ida ne’e, hodi fó posse de’it ba embaixador na’in tolu ne’ebé ida ba EUA, Nova Zelandia no Brazil, tolu ne’e mós deputadu balun haree katak, ninia konfigurasaun husi kandidatu na’in tolu ne’e, koneksaun mós ho partidu polítiku balun, ho ida ne’e Prezidente fó posse lalais ne’e, maibé sira seluk ne’ebé mak laiha koneksaun ho partidu polítiku ne’ebé a favor ba sira-nia interesse, sira sei dada, ne’e triste bo’ot, maibé normalmente, kuandu ita hato’o tiha nomeiasuan, lista sira ne’ebé mak ita aprezenta ba PR, ita hato’o kedas ba país sira ne’ebé mak ita-nia ema sira atu destaka ba, no mós depende ba país sira ne’e nia resposta mai ita kona-ba ema na’in hirak ne’ebé mak ita propoin nu’udar embaixador, maibé lafiar katak, país sira ne’e mak halimar fali polítika hodi dada fali ema na’in hirak ne’e nia naran to’o tempu ida naruk tebes, fulan rua tolu ne’e la fiar. Bai-bain ne’e iha komunikasaun, atu bele mantein ita-nia relasaun di’ak ho país sira ne’e, sira mós hakarak mantein relasaun di’ak ho ita, namdigas sira mak dada fali tempu ida ne’e, to’o fali fulan rua tolu”, subliña Maria Angelina Sarmento.

Lejisladora ne’e haktuir, embaixada iha nasaun barak mak sei priense ho embaixador enkaregadu, liu-liu hanesan Singapura, tanba ne’e bele fó impaktu Timor-Leste nia adezaun ba Asean.

“Singapura enkaregadu kuaze tinan 1 ona, Thailandia fulan ida ou rua ona, Bruxelas mós enkaregadu besik tinan ida ona, iha nasaun lubuk ida mak ita sei hala’o kna’ar hanesan enkaregadu, ida ne’e hatudu imajen ba ema katak, keta Timor-Leste rekursu humanu laiha karik, keta TL la preparadu atu indika ema sira ne’ebé bem preparadu atu bele sai emabaixador destaka ba fatin sira ne’e. Ema bele hamosu perguntas barak ba ita, liu-liu tanba agora ita duni hela atu tama nu’udar membru ASEAN, depois ita-nia país sira ne’ebé mak embaixador sira vaga hela, ita la priense lalais, ita hotu hatene, Singapura mak nasaun ida ne’ebé resistente  tebes, kona-ba ita-nia kandidatura tama ba ASEAN, iha país ne’e duni mak ita-nia embaixador laiha, no enkaregadu kuaze tinan ida ona, ne’e fó impresaun ladi’ak ba ema atu hateten, ita seidauk bele simu sira, tanba embaixador sira de’it mós Timor-Leste seidauk bele indika to’o agora”, akresenta deputada Angelina.

Lee hotu :   PPN prontu rezigna-an hafoin rezolve OR ''Proposta destituisaun ilegal''

Iha sorin seluk, deputada bankada FRETILIN, Lidia Norberta esklarese, embaixador na’in tolu ne’ebé mak PR fó posse, la’os tanba kór partidu, maibé tanba hanesan profissional no embaixador de kareira.

“Hanesan ema ne’ebé uluk servisu iha MNEK, ha’u koñese di’ak tebes, embaixador na’in tolu ne’ebé mak nomeia, atu esklarese katak, sira ne’e embaixador de kareira.  Desde 2002 to’o mai agora, ministériu negósiu estranjeiru rasik laiha emabaixador de kareira barak, tanba ne’e mak husi 2002 mai ne’e sustenta ho, alende embaixador de kareira, sustenta ho nomeiasaun polítika, ne’e situasaun ida ne’ebé mak husi 2002 mai. Agora embaixador tolu ne’ebé mak hetan uluk nomeiasaun ne’e, ne’e embaixador de kareira, sira funsionáriu ministériu nian ne’ebé mak tama mós iha lista ida ne’e”, esplika deputada opozisaun ne’e.

Deputada Lidia mós salienta, Xefe Estadu deside fó posse uluk embaixador na’in tolu ne’e, dala ruma tanba bazeia ba karta aseitasaun, husi nasaun hirak ne’e, la’os tanba bazeia koneksaun polítika.

“Iha relasoens diplomatas, iha konvensoens ida, ko’alia mós liafuan ida karta aseitasaun husi nasaun seluk, dalaruma ne’e mós influensia karik, nune’e bele mosu katak, na’in tolu ne’e mak mai uluk hetan nomeiasaun, no sira seluk seidauk, la’os tanba mai husi instrumentu polítiku ida, maibé haree mós ba sira-nia kapasidade profesional ne’ebé mak ikus sira ho naran embaixador de kareira”, tenik deputada FRETILIN ne’e.

Iha Tersa loron 13 fulan Agostu ne’e, Xefe Estadu Francisco Guterres Lú Olo, fó tomada de posse ba embaixador na’in tolu mak hanesan, Olímpio Branco, Isildo Coelho no Lisualdo Gaspar. Sai hanesan embaixador ba nasaun tolu, Estadus Unidus Amérika, Nova Zelandia no Brazil.oly/say

Add to Comments Here!!!!

error: Content is protected.
Secured By miniOrange
You might also like:
Rezultadu avaliasaun projetu 143 sei fó sai iha tempu badak

Ministeriu Obras Publikas sei fó sai...

Liu ona loron 30 la foti desizaun ba pakote lei RAEOA, PN konsidera PR Lú Olo viola konstituisaun

Primeiru Vise Prezidenti Parlamentu Nasional (PN),...

Dia 14/08/2019 || GMNTV LIVE STREAM || JORNAL NASIONAL KALAN

Close