Líder ParPol tenki sukat ibun iha komunikasaun ho kuadru sira

Dekanu Siénsia Polítiku    Universidade Nasional Timor-Lorosa’e (UNTL), Camilo Ximenes Almeida, husu ba líder  Partidu Polítiku  (ParPol) sira ténki  sukat ibun iha komunikasaun entre  kuadru no deputadu sira iha Parlamentu Nasional (PN), hodi labele implika ba dezenvolvimentu partidu.   

“Ha’u hanoin ho hanoin líder  partidu politiku ne’e diak, maibe presiza hadia mós komunikasaun polítika ida ne’ebé mak diak,  kuandu ita koalia kona-ba komunikasaun polítika  ita ténki iha karakter balun  presiza hadia. Tanba  ne’e ha’u sujere ba  líder partidu polítiku sira  sé bele iha sira nia reprezentante  portavoz  hodi nune’e bele tetu ona buat ne’ebé mak bele koalia sai no buat balun ne’ebé la presiza koalia sai, tanba kuandu koalia sai ne’e bele afeta direta ba partidu. Tanba  ita harii partidu la’os ema ida ka rua nia hakarak, maibe hanoin sira ne’ebé komun”,esplika Dekanu Siénsia         Polítiku  UNTL, Camilo Ximenes Almeida, ba GMN, Tersa (13/08/19), iha nia kna’ar fatin Kaikoli, Díli.

Camilo koalia lia hirak ne’e mós, relasiona ho deklarasaun polítika husi Sekretariu Jerál Partidu, Marí Alkatiri, ne’ebé sai iha iha media sosial hodi ameasa sei hasai kuadru balun husi partidu FRETILIN liu-liu deputadu sira ne’ebé mak la apoia programa partidu ninian.

“Ha’u hanoin  señor Marí Alkatiri  nia koalia ne’e karik  refere ba deputadu  sira balun, ba ha’u liafuan ida  ne’ebé mak  bele koalia  no  liafuan ne’ebé mak la presiza koalia,  tanba liafuan sira dala ruma sai  ne’e bele soke  ema balun nia hanoin dentro de  partido ida  de’it. Tanba  ne’e mak presiza hadia komunikasaun sira ne’e”,dehan Camilo.

Nia subliña,  kuaze  partidu  polítiku sira hala’o sira-nia funsaun la ho diak, quer dizer membru sira dezorientadu, dezorientadu tanba ida-dak la’o laiha orientasaun   husi  polítiku nain partidu sira, tanba sede partidu deít sira la ba tiha ona.

“Ha’u sempre dehan  katak, partidu sira nunka hala’o sira-nia funsaun ho diak, tanba sira ba  tuur   ona iha  governu ne’e , partidu mak delega nia, tanba  povu hili partidu. maibe dala ruma loron Sesta no Sábadu   sira la vizita sede partidu, maibe balun ba liu Viqueque, Lospalos. No deputadu sira mós hanesan. Sede partidu bandeira mós dodok ona , ne’e ha’u-nia obbservasaun durante ha’u la’o ho estudante sira iha munisípiu”,dehan Camilo.

Dekanu Siénsia   Polítiku Universidade Nasional Timor-Lorosae (UNTL), Camilo Ximenes Almeida, husu  líder Timor-oan sira  ténki unidade hodi dezenvolve nasaun ne’e.

“Nasaun balun iha mundu forte, tanba líder  sira hamutuk, líder  sira hatene ida ne’ebé mak segredu nasaun. ida ne’ebé segredu nasaun ninian presiza asegura segredu, labele koalia hotu segredu nasaun ninian, ita koalia sai hotu, Amerika forte tanba ida ne’e”, esplika Camilo Ximenes Almeida.

Camilo subliña hodi konta tuir esperiensia abitante Amérika sira hala’o servisu iha nasaun seluk dehan volontáriu, maibe servisu ne’ebé mak nasaun delega ba sira atu hala’o hodi relata fila-fali ba iha sira-nia nasaun.

“Agora  ita iha Timor segredu nasaun ninian  ita koalia sai hotu, laiha segredu ida ne’e,  problema  boot ida ba  ita. Sá tan  nasaun ne’ebé mak foin sai husi konflitu, nasaun  ne’ebé mak  ita iha mina  ne’ebé   ita presiza asegura didiak.  Ita  ba iha  ema nia nasaun ema sempre husu o mai husi ne’ebé, ita sempre responde mai husi Timor-Leste, ema sempre dehan Timor mak riku ho mina ne’e, orgullu nu’udar Timor riku ho mina. Mas dala ruma  ita-nia líder sira koalia buat ida  ne’ebé mak laiha segredu, ha’u tristi teb-tebes  hanesan jerasaun foun, ha’u hanoin  ita ténki obriga sira ténki hamutuk bele rezolve problema sira kestaun jerál, kestaun vida nasaun ninian, dezenvolvimentu nasaun ninian”,dehan Camilo Ximenes.avi