Alkatiri: Direitu autodeterminasaun tenki garante tratamentu hanesan

Sekretáriu Jeral Partidu FRETILIN, Mari Alkatiri, informa, direitu autodeterminasaun ne’e la’os ba deit independensia, maibé oinsa atu fó tratamentu ne’ebé hanesan ba ema hotu-hotu.

“Autodeterminasaun signifika minoria sira iha direitu atu hetan rekoñesimentu no tratamentu ne’ebé hanesan no autodeterminasaun hanesan mos sistema permanente ida, tanba ohin loron ema hotu ko’alia liu ba inkluzaun, tanba ne’e maioria sira tenki iha respeitu no fó tratamentu ne’ebé hanesan, hodi loke dalan ba ema hotu, liu-liu minoria atu hetan rekoñesimentu husi maioria sira”, Mari Alkatiri hafoin partisipa semináriu ho tema direitu ba autodeterminasaun, hodi komemora loron konsulta popular ba dala 20, iha kampus UNTL, Caicoli-Díli, Kuarta (04-09-2019).

Atual Sekretáriu Jeral FRETILIN ne’e akresenta mós katak, iha nasaun demokrátiku, demokrasia ne’ebé di’ak presiza iha lideransa polítika ne’ebé di’ak no nakonu ho konsiensia hodi rekoñese no servi povu.

“Demokrasia ne’ebé di’ak presiza lideransa polítika ne’ebé di’ak, ho konsiensia ne’ebé di’ak hodi rekoñese no servi duni povu, signifika labele haluha katak, povu la’os deit hirak ne’ebé manan iha eleisaun, maibé povu hirak ne’ebé la manan iha eleisaun mós kontribui iha prosesu rekonstrusaun Estadu, tanba ne’e tenki iha konsiensia hodi rekoñese sira, maibé la’os atu hadau malu kadeira, maibé tenki rona sé mak ukun, iha prosesu demokrasia presiza fó tratamentu no rekoñese ema hotu nia kontribuisaun ba konstrusaun Estadu, tantu partidu ne’ebé manan iha eleisaun no hirak ne’ebé la manan iha eleisaun”, afirma Mari Alkatiri.

Husi sorin seluk, Dekanu fakuldade Direitu, Isodoro da Costa Viana hateten, objetivu prinsipal UNTL realiza semináriu ne’e atu hakle’an koñesimentu estudante ou universitáriu sira kona-bá istória no prosesu ba libertasaun nasional, hodi hatene saída mak presiza hadi’a iha futuru.

“Ita manan ona independensia, maibé oinsa atu kuda konfiansa iha povu nia fuan ne’ebé liga ho edukasaun, lideransa no governasaun ne’ebé di’ak, tanba ne’e presiza forma atitude no polítika lider sira ni’an ba governasaun, maibé kuandu laiha polítika konsistente mak sei iha problema ba povu,” dehan Dekanu fakuldade Direitu-UNTL ne’e.

Entretantu partisipa iha seminariu ne’e, Sekretáriu Jeral FRETILIN, Mari Alkatiri, inklui Dekanu Fakuldade Direitu, Isodoro da Costa Viana no estudante universitáriu sira. ita