Ian Martin : Xanana nu’udar lider extraordináriu

Reprezentante Espesial Sekretáriu Jeral Organizasaun Nasoens Unidas (ONU), Ian Martin, rekoñese Xefe  Negosiador Fronteira Marítima,  Kay  Rala  Xanana Gusmão, nu’udar lideransa extraordináriu tebes, tanba durante  prosesu konsulta popular ba Timor-oan  sira iha tinan 1999, UNAMET hala’o  kontaktu diak ho Xanana Gusmão hodi organiza konsulta popular.

“Xanana nia lideransa extraordinariu tebes, no ha’u iha previleziu hodi bele hasoru nia pela primera-vez iha rezidensia prizaun nian iha Jakarta, no Nasoens Unidas hala’o kontaktu diak  ho nia durante konsultasaun popular nian, no sei la’os tanba nia determinasaun atu votasaun ne’e kontinua, no limitasaun ne’ebé mak nia ho Taur Matan Ruak, ezerse nu’udar lider FALINTIL nian atu la impede votasaun, ha’u senti buat hirak ne’e sei la atinji tanba sira-nia kolaborasaun ne’ebé diak”,  dehan Ian Martin ba Jornalista  GMN iha Estudio GMN Bebora Díli, Segunda (02/09/2019).

Tanba ne’e, Ian Martin mós  hakarak presta homenajen ba lider sira hotu ne’ebé mak servisu durante luta ba libertasaun nasional,  ba parte rua hotu, sira ne’ebé mak servisu  nu’udar kombantente iha rai laran no mós ba sira ne’ebé mak servisu nu’udar diplomata iha rai liur hanesan Ramos Horta, Marí Alkatiri, foin sa’e estudante sira, tantu feto no mane, ne’e nu’udar história extraordinariu ida husi luta extraordináriu ida.

Ian Martin kontenti tebes fila-fali  mai Timor-Leste iha momentu  agora,  nu’udar momentu emosionante tebes mai nia hodi fila-fali mai, los duni katak, nia maluk internasional barak husi tempu UNAMET nian  hasoru hikas fali eis  staf lokal sira.

“Ida ne’e furak tanba bele haree espíritu 1999 nian moris hela no konsege hatutan hikas fali ba jerasaun foun sira, no bele haree hikas saida mak konsege atinji ona, no hira tan mak persiza hakas aan tan. Timor-Leste nia auto determinasaun, no independensia atinji duni liu husi luta ne’ebé naruk durante tinan 24, tanba deit lider notaveis balun mak servisu hamutuk, no ha’u hein katak, espíritu ne’ebé hanesan ne’ebé mak halo sira kolabora hamutuk antes ne’e,  bele kontinua nafatin ba iha prosessu dezenvolvimentu nasaun ne’e”, katak Ian Martin.

Iha biban ne’e mós, eis Xefe UNAMET ne’e  salienta, nia  impresionadu tebes ho kualidade fasilidade ne’ebé mak  GMN  iha, klaru mós iha profesionalismu ne’ebé mak hatudu hodi dezenvolve ninia obra sira.oly