Arsenio Bano hakfodak governu seidauk hili Prezidente Autoridade RAEOA

Prezidente Autoridade Interinu Rejiaun Administrativa Espesial Oe-cusse – Ambeno (RAEOA) Zona Eskonomia Espesial Sosial Merkado (ZEESM), Arsenio Bano senti hakfodak wainhira rona governu sentral seidauk hili Prezidente Autoridade foun.

“Hai …….buat la pronto ne’e ita atu ba ne’ebé, hau pronto hau lolos ne’e interinu dala 2 ona ,tamba hau Oecusse oan, ema Timor-Leste laiha problema ,atu troka hau ne’e kompetensia husi governu sentral nune’e ami ne’e hanesan santai-santai no siap-siap de’it ne’ebé to’o agora seidauk iha is ruma husi governu sentral”, dehan Arsenio Bano,hafoin halo aprezentasaun relatório Orsamentu Jeral Estadu tinan 2019 alokadu ba RAEOA – ZEESM nian, Tersa (29/10), iha Parlamentu Nasionál.

Tuir Lei número 3/2014 RAEOA ba Prezidente interinu ZEESM – RAEOA Arsenio Bano, nia mandatu sei remata iha loron 30 Novembru, tinan ne’e, maibe to’o agora governu sentral seidauk hili ema ne’ebé atu troka Arsenio hodi lidera ZEESM – RAEOA ba tinan Lima.

Prezidente Autoridade Interinu RAEOA ne’e esplika ,to’o agora seidauk iha i’is ruma husi Governu sentral ne’ebé lidera husi Primeiru Ministru Taur Matan Ruak, hodi nomea ema ruma atu lidera RAEOA – ZEESM.

To’o agora Prezidente Autoridade Interinu RAEOA Arsenio Bano hein hela ema ne’ebé maka governu hili atu troka nia hodi lidera RAEOA-ZEESM.

Arseno Bano sai Prezidente Autoridade RAEOA-ZEESM interino hafoin madantu Prezidente Autoridade Mari Alkatiri remata iha 31 Jullu 2019.  Arsenio Bano sai prezidente autoridade interinu ba loron 120 ( fulan hat) hodi hein prezidente autoridade foun ba tinan lima oin mai.

Ezekusaun OJE iha RAEOA seidauk hotu

Prezidente Interinu Rejiaun Adminstrativa Espesial Oe-cusse Ambeno-Zona Espesial Ekonómia Sosial Merkadu (RAEOA-ZEESM), Arsenio Bano relata, to’o agora ezekusaun Orsamentu Jerál Estadu (OJE) RAEOA nian tinan 2019 seidauk hotu, tanba Governu sentrál halo transferensia tarde.

“Hafoin Dr. Marí hakotu nia mandatu nu’udar Prezidente Autoridade  iha tinan ida ne’e, ami foin mak hetan transferensia orsamentu jerál husi Governu sentral iha fulan Juñu, tanba ne’e difisil tebes ba ami atu ezekuta ho di’ak maibé, ami halo ezersísiu, hodi halo ezekusaun orsamentu husi rejiaun Oe-cusse la’o di’ak”,hatete Arsenio Bano, bainhira halo audiensia ho Komisaun E,C,D no F Parlamentu Nasionál, iha sala plenária, Tersa(29/10/2019).

Aleinde ne’e, Sekretária ZEESM, Leonia Monteiro, informa, funsionáriu sira kuaze simu osan tarde, tanba sei hein Governu sentral atu transfere tan osan millaun USD 30 ne’ebé Governu seidauk aloka.

“Primeira faze ne’ebé Governu aloka ba Oe-cusse iha fulan Janeiru ho montante millaun USD 2, no iha 10 de Juñu aloka tan millaun USD 35, hamutuk foin mak millaunUSD 37. Tanba ne’e, funsionáriu sira fulan ne’e sei simu saláriu tarde, tanba sei hein osan restu husi Governu sentral”, relata Leonia Monteiro.

Ba tinan 2020, Autoridade RAEOA-ZEESM Propoin kuaze dollar amerikanu miliaun USD 117, hamutuk iha proposta OJE ba tinan 2020 ne’ebé Governu propoin USD 1.950.Tos/say