Implementa polítika dezentralizasaun, AMP aprezenta projetu lei rua ba komisaun A PN

Atu implementa la-lais polítika desentraliazasaun, meza Parlamentu Nasional (PN) submete ona projetu lei rua (2), hanesan poder lokal no eleisaun munisipal ba komisaun A, ne’ebé trata asuntu justisa no konstitusional hodi deskuti.

Proposta lei rua ne’e rasik, aprezenta husi deputadu sira husi bankada Aliansa Maioria Parlamentar (AMP).

“Ida ne’e ami baixa, tanba grupu deputadu sira tuir rejimentu, aprezenta projetu lei rua, hanesan poder lokal no eleisaun munisipal ni’an no projetu rua ne’e, depois de konklui tiha pareser nota téknika, husi diplen. Ami fó tempu ba komisaun A, to’o loron 30, fulan Janeiru, tinan 2020, tenki aprezenta relatóriu, para deskuti no halo aprovasaun iha jeneralidade iha PN”, Prezidenti PN, Arão Noe ba jornalista sira iha PN, Tersa (22-10-2019).

Xefi Órgaun Lejislativu ne’e akresenta, maski projetu lei rua ne’e submete ona ba komisaun A, maibé seidauk bele deskuti, tanba sei konsentra uluk lai proposta Orsamentu Jeral Estadu (OJE), tinan 2020.

“Substansia husi lei rua ne’e, uluk atu fó podér lokal ba kraik, lei ne’e rasik uluk aprova tiha ona iha PN III lejislatura, maibé Prezidenti Repúblika (PR) veta tiha, depois kaduka, tanba momentu ne’ebá tama ona iha eleisaun, nune’e PN labele halo votus konfirmasaun, tanba ne’e mak agora hanesan prosesu foun fali, maibé textu ne’ebé proponente sira aprezenta mai, textu ne’e nafatin anterior ni’an, ne’ebé mak PR veta no Pn III lejislatura ni’an aprova tiha ona, tanba ne’e, depois mak ita sei haree fali, debate iha plenária, atu halo alterasaun ka introdusaun buat ruma, kabe ba kompetensia plenária ni’an, maibé agora seidauk bele deskuti, aproveita baixa deit, tempu debate ne’e só depois de aprovasaun proposta OJE 2020, mak komisaun bele halo apresiasaun ba projetu lei rua, ne’ebé ohin baixa ona”, subliña Prezidenti PN ne’e.

Entretantu lei poder lokal ne’e rasik, konsege aprova iha PN III lejislatura ho votus a favor 41, kontra 0 no abstensaun 4, maibé hetan veta husi Xefi Estadu, Francisco Guterres “Lú Olo”, tanba sei konfundi ho artigu balun husi lei refere. say