Arão Noe: Labele jeneraliza líder tuan la fó importánsia ba dezenvolvimentu nasional

Prezidenti Parlamentu Nasional (PN), Arão Noe, husu, jerasaun foun sira labele jeneraliza líder tuan sira, dehan la fó importánsia ba dezenvolvimentu nasional, maibé tenki hanoin mós katak, líder tuan sira ukun nasaun ida ne’e, tanba hetan konfiansa husi povu.

“Jerasaun foun sira labele jeneraliza líder tuan sira hotu la fó importánsia ba dezenvolvimentu nasional, ema hotu bele fó nia hanoin no análiza situasaun, maibé líder tuan sira ukun, tanba rezultadu husi eleisaun, la’os ho sira-nia ego mak hadau malu ukun iha rai ne’e. Ha’u hanoin laloos prosesu la’o hela, ita Timor kompara ho nasaun barak, Timor-Leste la-lais liu kompara ho nasaun sira seluk, tanba balun ukun-an tinan 70 mós sei mosu problema”, Prezidenti PN ba jornalista sira iha PN, Kuarta (13-11-2019), hodi responde deklarasaun

jerasaun foun sira ne’ebé konsidera, jerasaun tuan sira trava malu tanba sira-nia interese hodi dada impase polítiku iha rai-laran dura ona ba tinan rua nia laran.

Tuir Xefi Órgaun Lejislativu ne’e, akresenta, maske líder tuan sira involve direta luta ba rai ida ne’e, maibé sira ukun nasaun liu husi prosesu eleitoral katak, povu mak hili sir aba ukun.

“Jerasaun tuan sira ukun liu husi prosesu rezultadu eleitoral, mezmu sira mai husi luta naruk ida, maibé partisipa iha prosesu demokrásia hodi harí partidu no kompete iha eleisaun, nune’e la’os jerasaun tuan sira uza sira nia ego hodi hadau ukun”, tenik Prezidenti PN ne’e.

Antes ne’e, joventude rezisténsia loriku asu-wa’in, Eusebio Gouveia, hateten, jerasaun foun konsidera jerasaun tuan egoísta demais, tanba lakohi tur hamutuk, hodi rezolve impase polítiku iha rai-laran. ety