FRETILIN konsidera LuGu lidera RAEOA la tuir méritu ■ PM Taur: LuGu ema ida esperiénsia

Reprezentante povu iha uma fukun Parlamentu Nasional (PN), liu-liu bankada Frente Revolucionário do Timor-Leste Independente (FRETILIN)  konsidera konfiansa ne’ebé governu fó ba Prezidenti partidu Frente Mudansa, José Luis Guterres hodi lidera Rejiaun Administrativa Espesiál Oe-Cusse Ambeno (RAEOA)-Zona Espesiál Ekonómia Sosial Merkadu (ZEESM), hodi troka Mari Alkatiri ne’e la tuir méritu.

“Ida ne’e kompeténsia governu ni’an, tuir alterasaun lei ne’e kompeténsia no desizaun husi Konsellu Ministru (KM), ba ha’u nia hanoin ita tenki kaer prinsípiu ema loloos iha fatin ne’ebé loloos, ida ne’e maka ita bele halo jestaun di’ak, la’os tanba ita nia hakarak, maibé ita tenki koloka ema ne’ebé loloos iha fatin loloos”, Vise Xefi bankada FRETILIN ba jornalista sira iha PN, Kuarta (07-11-2019).

Francisco Branco, esplika, governu tau ema la tuir méritu, tanba José Luis Guterres laiha experiénsia kona-bá administrasaun, tanba ninia experiénsia servisu mak halo diplomasia, nune’e karik ba diplomasia mak desizaun ida ne’ebé loos.

“Governu tau ema la tuir méritu tanba José Luis Guterres laiha experiénsia kona-bá administrasaun, maski iha tempu rejistensia mós servisu hanesan diplomasia, bainhira diplomata nia halo diplomasia, ida ne’e maka dezisaun loloos, maibé KM hasa’i ona desizaun. Ha’u hanoin nomeiasaun ne’e atu ba halo administrasaun no jestaun, ne’e oinsa, tanba Jose Luis Guterres laiha experiénsia kona-bá administrasaun, hanesan maibé ne’e hanesan kometáriu deit, tanba desizaun KM fó sai tiha ona tuir lei kompeténsia Xefi Governu ni’an sai Prezidenti RAEOA-ZEESM, ne’e komplexu teb-tebes”, tenik Vise Xefi bankada FRETILIN ne’e.

Husi sorin seluk, Xefi bankada bankada Congresso Nacional Reconstrução de Timor (CNRT) Duarte Nunes, hateten, kona-bá atu apoiu Prezidenti RAEOA-ZEESM, José Luis Guterres, partidu maka sei hola desizaun oinsa mak bele apoiu Prezidenti foun ne’e.

“Tuir lei estatutu RAEOA-ZEESM, hafoin halo revizaun kna’ar ne’e iha Primeiru Ministru (PM) no KM nini’an, desizaun halo tiha ona, agora ita hein deit, Jose Luis Guterres forma nia ekipa toma pose, ita hare to’ok, ami nia hanoin partidu mak sei hola desizaun oinsa mak fó apoiu nia desizaun, husi partidu ami husi bankada AMP ha’u hanoin ida ne’e desizaun governu ni’an ita haree no ita espera partidu ida-idak mós hola desizaun hodi fó apoiu atu nune’e nia bele hetan susesu. Espera katak nia bele rezolve problema iha RAEOA-ZEESM, liu-liu governu, tanba governu maka iha responsabilidade fihir ema hodi nomeia”, hateten Xefi bankada CNRT ne’e.

Enkuantu iha Kuarta, loron 6, fulan ne’e, PM, Taur Matan Ruak aprezenta proposta rezolusaun governu  kona-bá nomeasaun eis Vise Primeiru Ministru iha governasaun Aliansa Maioria Parlamentar (AMP), José Luis Guterres hodi lidera RAEOA-ZEESM.

Tuir lei RAEOA-ZEESM katak, mandatu atual Prezidenti Interinu RAEOA-ZEESM, Arsenio Bano, sei remata iha loron 30, fulan Novembru, tinan ne’e ho loron 120. Tanba ne’e, liu husi reuniaun ordináriu KM iha Kuarta ne’e, desidi hodi apoiu proposta ne’ebé PM aprezenta.

Hahú ohin ba oin, governu fó tempu ba José Luis Guterres atu prepara harí ekipa, hodi responde ba ezijensia hirak ne’ebé durante ne’e ema hotu preokupa.

PM Taur nomeia Lugu tanba iha esperiénsia

Primeiru Ministru Taur Matan  Ruak hatete,  desizaun governu nian liu husi Konsellu Ministru hodi nomea eis Vise Primeiru Ministru no mós eis Ministru Negósiu Estranjeiru no Kooperasaun (MNEK), José Luis Guterres ‘Lugu’ hodi lidera Rejiaun Administrativa Espesial  Oe-cusse Ambeno (RAEOA), tanba LUGU iha esperensia barak kona bá lideransa.

“Ami sei halo desizaun ida hodi invalida desizaun antes ba José Luis Guterres kona bá atu asume kna’ar embaixador ba Zenebra, no sei halo nomeiasaun foun, tanba desizaun ne’ebé Governu iha hodi nomeia Luis Guterres, tanba iha kompetensia, ema rezistensia no iha esperensia barak hanesan lideransa”, relata Taur Matan Ruak ba Jornalista sira iha Palásiu Prezidensial Nicolau Lobato Bairo Pité Díli,  Kinta (7/11/2019).

Taur salienta, antes ne’e LUGU asume pasta hanesan Vise Primeriu Ministru, iha ne’ebé integra aan iha governasaun  barak, ida mak hanesan eis Ministru Negósiu Estranjeiru no Kooperasaun (MNEK).

Alende ne’e, desizaun nomeasaun ne’e Governu deside iha loron 6 fulan Novembru tinan 2019, liu husi Konsellu Ministru.

Antes ne’e,  Prezidente tuan RAEOA-ZEESM, Marí Alkatiri  remata nia mandatu durante tinan lima,  no termina ona nia mandatu iha loron  tolu nulu fulan Jullu liu ba, no  RAEOA-ZEESM lidera fila fali  husi Prezidente Interinu Arsenio Paixão Bano,   ne’ebé tuir Lei RAEOA-ZEESM mandatu Prezidente Interinu nian sei termina iha loron tolu nulu fulan Novembru ne’e ,  hodi kompleta loron 120.ety/oly