Governu fó konfiansa ba José Luis Guterres lidera RAEOA-ZEESM

Oitavu Governu Konsititusional fó konfiansa ba Prezidente Partidu Frente Mundansa, José Luis Guterres  hodi lidera Rejiaun Administrativa Espesiál Oe-Cusse – Ambeno (RAEOA) – Zona Espesial Ekonomia Sosial Merkadu (ZEESM) hodi troka Mari Alkatiri nebe mandatu remata iha 31 Jullu liu ba.

Dezisaun ba Prezidente Autoridade foun RAEOA – ZEESM nee liu husi reuniaun Konsellu Ministru, Kuarta (06/11), tanba tempo ba Prezidente Autoridade RAEOA – ZEESM Interinu, Arsenio Bano sei remata iha 30 Novembru, tinan nee.

“Ita bo’ot sira hatene mós katak,RAEOA/ZEESM Prezidente Interinu  iha loron 30, fulan Novembru ne’e nia mandatu hotu ba fulan Haat, ne’ebé Konselu Ministru halo desizaun ida ohin (horseik –red) simu Proposta husi Primeiru Ministru Taur Matan Ruak hili Eis Primeiru Ministru Dr.José Luis Guterres  ,maka sai Prezidente foun ba RAEOA/ZEESM nune’e bele tempu  atu prepara no hari’i nia ekipa hodi responde ba ejijensia ne’ebé Rejiaun Espesial Oecusse Ambeno”, dehan Ministru Estadu Prezidensia Konsellu Ministru Agio Pereira, ba Jornalista sira, iha Palásiu Governu.

Tuir Lei RAEOA-ZEESM katak, mandatu Prezidente Autoridade  RAEOA-ZEESM remata maka ema numero dois iha autoridade nee asumi pasta nudar Prezidente Autoridade interinu ba loron 120 ( fulan Haat).

Nunee governu haree katak Prezidente Autoridade Interinu  RAEOA – ZEESM kompleta loron 120 iha 30 Novembro, tanba nee Primeiru Ministru Taur Matan Ruak, aprezenta proposta Rezolusaun Governu konabá nomeasaun eis Vise Primeiru Ministru iha Governasaun Aliansa Maioria Parlamentár José Luis Guterres hodi lidera RAEOA-ZEESM.

“Hahú ohin ba oin Governu fó tempu ba eis Ministru Negósiu Estranjeiru no Kooperasaun José Luis Guterres ,atu prepara hari’i nia ekipa hodi responde ba ezijensia hirak ne’ebé durante ne’e ema hotu preokupa”,dehan Agio Pereira.

Iha Segunda (4/11), José Luis Guterres hatete katak  Primeiru Ministru ba bolu nia ba hasoru hodi informa konaba dezisaun governu nian nebe nomeia nia ba embaixadór Timor – Leste nian ba Jenebra, maibe iha reuniaun Konsellu Ministru horseik deside fali LUGU lidera RAEOA – ZEESM.

José Luis Guterres LUGU antes nee asumi ona pasta nudar vise Primeiru Ministru iha Governu Aliansa Maioria Parlamentar, Ministru Negosius Estranjeirus no embaixadór Timor – Leste nian ba Nova Iorke.Tos