José Ramos Horta: Halakon kiak iha TL hahu husi ukun nain

Eis Prezidente Repúblika, José Ramos Horta, hatete, atu  halakon kiak iha Timor – Leste (TL), hahu husi ukun nain sira liu husi hakribi korupsaun, arogansia no labele gasta osan arbiru.

“Ita tun ba sidade,ita tun ba foho to’o kraik ita fó liman ba sira ne’ebé kiak no sira ne’ebé dok husi poder ,husi riku soin ,fó liman ba sira ajuda kiak  sira hamrik konvida sira la’o iha dalan ida ne’ebé naruk ho hari’i dame hari’i dezenvolvimentu humanu sé ita halo nune’e ita homilde duni sé ita hakribi korupsaun,ita hakribi hatudu a’an ,ita la gasta buat arbiru ,atu soe tiha kiak iha rai ida ne’e,ita tau osan bo’ot liu iha edukasaun,saúde hodi tau matan ba labarik oan sira ,ita tau osan bo’ot liu iha ikan,agrikultura,to’os para hetan seguransa alimentar sé ita tau osan bo’ot liu ba ita nia ai laran ba mota ba tasi ne’e hau fiar iha 2030 hanesan rai sira seluk ne’ebé iha planu dezenvolvimentu rasik hanesan ita rasik planu nasionál maibe SDG ita sei hetan duni to’o duni objetivu sira ne’e no mós Estadu demokratiku direitu”, dehan Laureadu Nobel da Paz José Ramos Horta, hafoin partispa fórum anual ba Datolu, konabá  Dezenvolvimentu Sustentável ba Páz, Justisa no Instituisaun efikasia,iha salaun Ministériu Finansas Aitarak laran,Segunda (12/11).

José Ramos Horta  esplika katak atu halakon kiak iha Timor-Leste ,hahú husi ukun nain to’o ba populasaun bain-bain, labele arogansia ba riku soin mundu nian, maibé tenki servi povu ho laran diak, haraik an no oin midar ba ema hotu hodi kontribui ba dezenvolvimentu rai ne’e ba oin.

Eis Xefe Estadu ba peridu 2007 too 2012 ne’e sujere ba Governu atu aloka orsamentu ho montante bo’ot ba  setór edukasaun, saúde no agrikultura ,tanba husi area hirak ne’e mak bele halakon kiak no mukit iha nasaun Timor – Leste.

Premiadu Nobel da Paz 1996  nee fiar katak Governu mak kada tinan aloka orsamentu bo’ot iha saúde, edukasaun no agrukultura, maka  iha tinan 2030 Timor-Leste mós sai ona nasaun dezenvolvidu hanesan nasaun sira seluk.Tos