PJR rejeita fó informasaun ba PR labele fó posse ba membru Governu pendente

Prokurador Jeral Repúblika (PJR), José da Costa Ximenes, rejeita informasaun husi públiku ne’ebé hatete katak, nia mak  atribui informasaun  ba Prezidente Repúblika (PR) Francisco Guterres Lú Olo, hodi labele fó posse ba membru oitavu governu nain 9 ne’ebé to’o ohin loron sai polemika.

“Ha’u informa ba Parlamentu Nasionál dehan, hanesan ne’e, sua exelensia Prezidente Repúblika ne’e simu informasaun husi orgaun hotu-hotu, ita hatene Prokuradro Jeral Repúblika ne’e fó informasaun mensal deit, dala ruma informasaun semanal sira ne’e halo ho Prezidenti Parlamentu Nasionál, Primeiru Ministru, Komandante Jeral PNTL  no autoriedade hotu-hotu”, relata José da Costa Ximenes ba Jornalista sira, Tersa (5/11/2019), iha Palásiu Prezidensial Nicolau Lobato Bairo Pité Díli.

Nia salienta, Prezidente Repúblika rona Prokuradoria Jeral Repúblika, rona Parlamentu Nasionál, rona husi Primeiru Ministru, Sosiedade Sivíl, rona husi elementu Estadu sira hotu, depois uza nia kompetensia para deside.

“Agora ha’u nia kompetensia ne’e saida?, horbainhira ha’u dehan, hakarak envolve PJR ne’e erru impersonal ( sigla Bahasa Indonezia alamat), la devia husu perguntas ida ne’e mai ha’u, agora resposta koretu mak saida?, polítiku ho polítiku sira hakoak malu problema akaba”, fundamenta José.oly