PM Taur: Vota kontra OJE 2020 kompetensia PN nian

Primeiru Ministru (PM), Taur Matan Ruak hatete, atu vota a favór ou kontra Orsamentu Jeral Estadu (OJE) tinan 2020 ne’e, kompetensia Parlamentu Nasionál (PN) nian.

Xefe Governu ne’e, afirma asuntu ne’e hodi responde kona bá deklarasaun husi Bankada CNRT ne’ebé ameasa atu vota kontra OJE  tinan 2020, tanba montante bo’ot liu.

“Pozisaun Governu nian  ba deklarasaun ne’e mak halo proposta ba Parlamentu Nasionál,  no Parlamentu nia papel mak vota a favór ka kontra, no  Prezidente Repúblika nia mak promulga, ida ne’e hatudu ida-idak iha nia funsaun, ami-nia funsaun mak aprezenta proposta maibé vota ou la vota ne’e Parlamentu mak hatene”, hatete Taur Matan  Ruak ba Jornalista sira Kinta, (7/11/2019) iha Palásiu Prezidensial Nicolau Lobato  Bairo Pité Díli.

Enkuantu iha Segunda foin lalais ne’e, deputada Virgina Ana Belo ameasa sei vota kontra OJE 2020, bainhira la iha mudansa ba ba kolokasaun sira balun ne’ebé konsidera latuir kategoria loloos. Bainhira hala’o audiénsia públika ho Ministra Finansa Sara Lobo Brites,  hodi diskuti kona bá tetu Orsamentu Jeral  Estadu tinan  2020, ne’ebé ho momtante atinji to’o bilaun USD 1.950.

Iha debate ba orsamentu ne’e, deputada Bankada CNRT ne’e kestiona ho kolokasaun orsamentu refere, tanba  kolokasaun balu la tuir kategória ida-ida nian, no montante orsamentu ne’e bo’ot demais.oly