PR veta LFP difikulta Timor GAP hala’o investimentu

Prezidente Parlamentu Nasionál (PPN), Arão Noe de Jesus da Costa Amaral hatete, Prezidente Repúblika (PR), Francisco Guterres Lú Olo veta alterasaun Lei Fundu Petrolífera (LFP) ne’e, difikulta ka fó impaktu  ba Timor GAP (Gas And Petroleum), hodi buka fundu bainhira atu halo investimentu ruma.

“LFP mak iha artigu iha liña ida veta ne’e mak sei lori ba plenária, hodi halo apresiasaun, ida seluk ne’e laiha problema, maibé apresiasaun mak iha pontu tolu ne’e, bele PN konfirma no lori hikas ba PR, bele halo alterasaun bele mós PN husik de’it ona, lalika book tan lei ne’e, maibé ne’e desizaun plenária nian. Nia impaktu no fundu laiha, maibé ba ita-nia kompañia Timor GAP mak iha impaktu, tanba nia presiza kapitál para bele halo investimentu, ida ne’e mak problema”, informa PPN Arão Noe ba jornalista sira, Kinta (27/11/2019).

Arão afirma, konteudu husi artigu 15 A númeru 3 ne’ebé Xefe Estadu veta ne’e, ko’alia liu kona-bá oinsa Timor GAP atu bele foti fundu husi fundu mina rai nian 5%, hodi investe iha rai laran ka rai liur.

PPN ne’e relata, alterasaun Lei Atividade Petrolífera ne’e rasik laiha problema, tanba tama ona iha vigor, no publika ona iha jornal da repúblika.

 “Tuir desizaun Tribunal Rekursu deklara alterasaun LAP konstitusional,  maibé alterasaun ba LFP mak iha artigu 15 A nú 3, mak deklara inkonstitusional, bazeia ba ida ne’e mak PR deklara veta. Tuir konstituisaun no rejimentu, iha 90 dias, ba PN hakarak halo apresiasaun, maibé tanba agora ami iha faze diskusaun orsamentu nian, tanba ne’e ami sei rai lai, depois de konklui tiha orsamentu jerál Estadu ne’e mak ami sei tau fali ajenda ba asuntu ida ne’e, maibé kabe ba plenária mak sei deside, hakarak halo reapresiasaun, alterasaun ka konfirmasaun votus, ne’e konforme plenária nia desizaun”,realsa Noe.

Desizaun ba alterasaun LAP ho LFP ne’e, Xefe Estadu deklara iha loron 26 fulan Novembru tinan ne’e, hafoin Tribunal Rekursu anunsia rezultadu fiskalizasaun.say

Leave a Reply

Your email address will not be published. Required fields are marked *