Prezidente Repúblika veta LFP no promulga LAP

Prezidente Republika (PR), Francisco Guterres Lú Olo, veta ona Lei Fundu Petrolíferu (LFP), no promulga Lei Atividade Petrolíferu (LAP), Tersa (26/11/2019).

Xefe Estadu veta dekretu Parlamentu Nasionál  ba alterasaun Lei Fundu Petrolíferu, tanba konsidera alterasaun ba lei ne’e inkonstitusionál.

Enkuantu Prezidente mós Promulga dekretu Parlamentu Nasionál númeru 10 /V segunda alterasaun ba lei númeru 13 / 2005, konaba Lei Atividades Petrolíferas (LAP).

Xefe Estadu desidi veta Alterasaun Lei Fundu Petrolíferu no Promulga Lei Atividade Petrolifeira ne’e, hafoin Tribunál Rekursu halo tiha fiskalizasaun preventiva konstitusionalidade.

“Hafoin hato’o ba Parlametu Nasional nudar Prezidenti Repúblika katak ha’u veta dekretu husi Parlamentu Nasional numeru 11/V, alterasaun daruak ba lei numeru 9/2005, 3 Agostu (lei konaba fundu minarai), Ha’u veta tanba haree katak numeru 3 husi artigu 15 A, ne’ebe tama iha artigu 3 dekretu ne’e la tuir Konstituisaun,” hatete PR Lu Olo.

“Ha’u mak husu ba Tribunal Rekursu atu haree took se laiha buat ruma iha dekretu ne’e hasoru ita nia lei inan, prosesu ne’e rejista iha Tribunal Rekursu NUC No:0059/19. TRDIL, iha 15 Novembru 2019 liu husi akordaun ida katak deklarasaun konjunta husi júis tolu Tribunal Rekursu deklara hamutuk no fó hatene mai ha’u katak artigu 3 husi dekretu Parlamentu nasional Numeru 11/V inkonstitusional duni, katak hasoru ita nia konstituisaun,” dehan, Prezidenti Repúblika liu husi deklarasaun ba imprensa ne’ebe mak hala’o iha Palasio Prezidensial, Nicolau Lobato, Bairu Pite-Dili.

Xefe Estadu ne’e dehan, nia veta tanba inkonstitusionalidade iha artigu ne’e hasoru fali Konstituisaun Repúblika ida ne’e tuir deit ita nia lei inan iha ninia alinea C no E artigu 85 numeru 1 artigu 88 nian no numerus 1,2 no 3 artigu 149 nian.

Maske nunee Xefe Estadu deklara nia promulga Lei Atividades Petroliferas (LAP).

“Ha’u fó hatene mos katak hau promulga ona Dekretu Parlamentu Nasional Numeru 10/ V, segunda alterasaun ba lei Numeru 13/2015, 2 Setembru Lei Atividade Petroliferas, tanba la hasoru Konstituisaun”, deklara Xefe Estadu Lu Olo.

Ema numeru ida iha nasaun nee mos husu ba Tribunal Rekursu atu halo fisklaizasaun prevetiva konstitusionalidade ba Dekretu Parlamentu Nasional ne’e ho instánsia ne’e fo hatene katak laiha buat ida hasoru Konstitusionalidade.

Liu husi akordaun ho Data 15 Novembru 2019, hatan ba prosesu ne’ebe rejista iha ne’ebe nudar NUC Numeru: 0061/19.TRDIL ne’ebe haruka husi Prezidenti Repúblika.

Nune’e, Xefe Estadu apela ba reprezentante povu iha parlamentu nu’udar lejisladór atu defende  no promove fundu minarai ne’ebé mai husi esplorasaun rekursu naturais minarai no gás, tanba rekursu sira ne’e sei maran iha tempu ruma.

Tanba nee tenke uza fundu minarai ne’e ho polítika no jestaun ida ne’ebé di’ak atu bele hetan rendimentu ne’ebé di’ak liu tan no ba beibeik.

Xefe Estadu mós apela ba deputadu sira  atu halo tuir nafatin Konstituisaun bainhira aprova lei sira kona-ba finansiamentu ka investimentu husi fundu minarai nian.Eus

Leave a Reply

Your email address will not be published. Required fields are marked *