TL presiza preparasaun diak iha área ekonomia molok tama ASEAN

Diretora Jeral ba Asuntu Association of Southeast Asia Nations (ASEAN), Milena da Costa Rangel, hatete,   Timor-Leste (TL) presiza halo preparasaun diak iha área ekonomia, molok adere ba ASEAN.

Milena da Costa Rangel hato’o asuntu ne’e hafoin sai orador iha semenáriu kona bá, oinsá Timor-Leste nia  preparasaun iha área ekonomia atu sai membru ASEAN.

 “Durante ne’e membru organizasaun nasaun ASEAN sira apoiu Timor-Leste atu sai membru ASEAN, maibé tenke preparadu iha área oi-oin hanesan, área seguransa, polítika, sosiu kultural no ekonomia, nune’e bele kompete ho nasaun membru ASEAN sira seluk, ne’eduni dadun ne’e ekipa inter ministerial la’o hela hodi halo sosializasaun ba pilar tolu atu bele responde kritéria sai membru ASEAN”, relata Milena dacosta Rangel ba GMN iha edifísiu Kebudaya an Indonézia Kaikoli Díli,  Segunda (25/11).

Diretora ba Asuntu ASEAN  ne’e husu ba estudante no entidade sira hotu atu up date informasaun kona bá ekipa sira-nia servisu hodi halo preparasaun iha área polítika, seguransa, sosiu kultural no ekonomia, antes Timor-Leste sai membru ASEAN.

“Oras ne’e total nasaun membru ASEAN hamutuk sanulu, ita hein katak, iha tempu ruma Timor-Leste bele sai membru ASEAN”, katak Milena.

Nune’e mós, Embaixador Indonézia iha Timor-Leste, Sahat Sitorus hatete,  objetivu prinsipal husi semenáriu ne’e, oinsá hadia liu tan aspeitu ekonómiku nu’udar kritéria ida ba adezaun iha organizasaun ASEAN nian.

iha fatin hanesan,  ofisial Diretur Jeral Koperasaun ASEAN, Foster Gultom afirma,  Indonézia prontu ajuda Timor-Leste liu husi fó formasaun  ba estudante no entidades sira seluk iha área politika, seguransa no ekonomia, antes tama ASEAN.

Semenáriu ne’e organiza husi embaixada Indonézia iha Timor-Leste ho delegasaun ofisial sira ASEAN  nian husi Indonézia.

Partisipa iha semenáriu ne’e, Dosente no Estudante husi Universidade Nasionál Timor Lorosae (UNTL) Universidade Díli (UNDIL) no Estudante sira seluk.

Antes ne’e, Ministru Negósiu Estranjeirus Timor-Leste, Dionísio Babo Soares mós hala’o ona vizita ba nasaun ASEAN sira hodi ko’alia kona bá oinsá Timor-Leste nia preparasaun atu tama ASEAN.aba