Aurélio Guterres: Baze ekonomia TL la’os mina-rai

Koordenadór Jerál Institutu Estadu Diplomata, Aurélio Guterres, hatete,  baze ekonomia Timor-Leste (TL), la’os mina-rai, maibé agrikultura, tanba maioria povu TL moris ho vida agrikultura.

Tanba ne’e,  Aurélio Guterres husu ba Governu atu dezenvolve di’ak liu tan setór agrikultura.

Aurélio Guterres informa asuntu ne’e hafoin partisipa semináriu Trilateral Timor-Leste  Korea ho Indonézia iha Praia dos Coqueiros, Díli, Kuarta (4/12/2019).

“Presiza kria planu ida ne’ebé di’ak hodi dezenvolve setór agrikultura, nune’e labele depende deit minarai, maibé atu dezenvolve setór agrikultura ne’e ho didi’ak, presiza apoiu husi Governu liu husi sosa produtu povu nian, nune’e osan bele sirkula iha ita-nia rain laran. Tanba ne’e  Governu tenke hadia nia polítika hodi bele dada investor mai Timor-Leste, hodi bele loke kampu traballu ba Timor oan sira, nune’e bele hadia ekonomia iha rai laran”, katak  Aurélio.

Nia haktuir, orsamentu Estadu atu sirkula iha rai laran, Governu presiza dada investe husi rai liur mai Timor,  nune’e bele fó servisu ba Timor-oan sira hodi dezenvolve nia moris, tanba nasaun Singapura ho Indonézia mós uluk antes adere ba ASEAN, hasoru dezafiu kona bá ekonomia.

Nune’e mós Ekonomista Indonézia, Parhimpunan Simatupang, hatete,  tuir lolos Governu tenke sosa povu nia produtu lokal, hodi nune’e osan bele sirkula iha komunidade nia leet.

Ekonomista ne’e mós halo komparasaun ho Nasaun Singapura ho Indonézia ne’ebé uluk banhira  tinan 100  mak foin bele adere ba ASEAN ne’ebé Timor -Leste  foin mak ukun aan tinan 17, maibé  parte ekonomia la’o maske la’o seidauk 100 %  diak liu fali Singapura ho Indonézia, maibé importante mak oinsa Timor-Leste nia  preparasaun.

Partisipa iha semináriu ne’e,  mai husi instituisaun Estadu, setór privadu no mós entidade sira seluk.aba