FRETILIN husu Governu klarifika projetu planta LNG

Bankada FRETILIN iha Parlamentu Nasional (PN) husi klarifikasaun husi governu kona-bá mudansa hanoin no desizaun muda projetu planta Liquefied Natural Gas (LNG), ne’ebé tuir planu muda fali ba postu administrativu Natarbora, munisípiu Manatuto.

Deputadu Dário Madeira husu governu presiza halo klarifikasaun ba povu, tanba povu hatene katak, antes ne’e projetu planta LNG ne’e sei estabele iha suku Maluro-Beaço, postu administrativu Viqueque Vila, munisípiu Viqueque.

“Povu sira iha Viqueque derepende rona projetu planta LNG muda fali ba Natarbora, presiza aprezenta razaun no difikuldade ruma iha Beaço, tanba ne’e Timor GAP no Xefi Negosiador Kay Rala Xanana Gusmão deside muda projetu LNG ba fali Natarbora, tanba populasaun iha suku Maluro sai vítima komesa tinan 2018 to’o tinan 2019, programa PNDS ne’ebé loloos tama iha suku Maluro kuaze tina rua nia osan la ezekuta ho razaun planta LNG atu ba iha Beaço”, deputadu bankada FRETILIN ne’e liu husi plenária iha PN, Tersa (10-12-2019).

Dário akresenta, abitante Beaço-Viqueque hein hela projetu planta LNG, tanba dau-daun ne’e Ministériu Agrikultura no Peska (MAP) la oferese trator, tanba tauk abitante sira halo plantasaun foun no impede planta LNG, maibé ikus mai dehan atu muda fali ba Natarbora.

“Governu presiza halo esplikasaun ba komunidada razaun saída mak governu muda fali projetu LNG ne’ebé tuir planu atu dada ba Beaço, maibé dada fali ba Natarbora”, tenik nia.

Hatán ba preokupasaun ne’e, Sekretáriu Estadu Komunikasaun Sosial (SEKOM), Merício Akara, promete sei hato’o asuntu ne’e ba ministériu kompetente.

Antes ne’e, Xefi Negosiador, Kay Rala Xanana Gusmão halo ona diálogu ho komunidade sira iha suku Maluro-Beaço, postu administrativu Viqueque Vila, munisípiu Viqueque kona-bá atu harí planta LNG iha Maluro-Beaço. ety