Tuir formasaun iha rai-liur, gasta deit osan Estadu

Reprezentante povu iha uma fukun Parlamentu Nasional (PN), liu-liu deputada bankada CNRT, Virgínia Ana Belo preokupa governu liu husi ninia ministériu sira nia ezekusaun orsamentu fin du anu, tanba gasta osan hodi formasaun ba kargu xefia sira iha rai-liur.

Deputada CNRT akresenta, tuir loloos ne’e fó kapasitasaun ba funsionáriu sira, la’os ba fali kargu xefia, hanesan Diretor no Xefi Departamentu sira, tanba kargu xefia sira ne’e iha ona kapasidade.

“Ita hasoru ema barak, Diretor no Xefi Departamentu sira iha Indoensia, hanesan Bali no Jakarta, hotu-hotu tuir treinamentu bainhira tama ona fin du anu, inklui ita Parlamentu Nasional (PN), tanba ne’e, ha’u la hatene saída mak akontese iha Estadu ida ne’e, sé hakarak fó kapasitasaun ka treinamentu ba funsionáriu sira ne’ebé foin tama ne’e sira presiza aprende, ida ne’e  bele simu, maibé kargu xefia sira hanesan Diretor no Xefi Departamentu sira, la hatene hili sai Diretor sira ne’e bazeia  ba saída, ka sira laiha duni experensia no laiha kapasidade ka oinsa, tanba  sa  mak tinan-tinan kargu xefia sira mak tenki tuir formasaun iha estranjeiru, nune’e husu ba governu atu tau atensaun ba asuntu ida ne’e”, Virgínia liu husi nia intervensaun iha plenária, Segunda (16-12-2019).

Hatán ba preokupasaun ne’e, Sekretáriu Estadu Komunikasaun Sosial (SEKOMS), Merício Akara, hateten, nia parte apoiu opiniaun husi deputadu sira, tanba ne’e iha tinan 2020 governu sei halo mudansa ba prosesu iha ministériu sira.

“SEKOMS mós iha orsamentu ba formasaun, liu-liu fundu dezenvolvimentu kapital  umanu, ami uza hodi fó formasaun ba jornalista sira, tanba ne’e tinan 2020 porsentu 90 sei fó formasaun iha rai-laran no deside la halo formsaun iha estranjeiru, Timor-Leste hanesan nasaun ona, ita apoia deit instituisaun ne’ebé fó formasaun atu kapasita iha rai laran, ho razaun orsamentu bele sirkula iha rai-laran no númeru benefisiáriu barak liu, kompara haruka ba rai-liur, tanba kapasitasaun iha rai-laran halo poupansa”, tenik SEKOMS ne’e.

Antes ne’e, Parlamentu Nasional (PN) mós sei reduz Orsamentu Jeral Estadu (OJE) tinan 2020, kona-bá pedidu viajen husi governu. ety