Camilo Ximenes : Impase polítiku halakon ona konfiansa povu

Dosente Universidade Nasional Timor Lorosa’e (UNTL), Camilo Ximenes, hateten ho situasaun impase polítiku ne’ebé akontese, halakon ona konfiansa povu nian, ba Koligasaun Aliansa Mudansa ba Progresu (AMP).

“Situasaun politiku ne’ebé agora la’o iha rai laran, liu-liu Orsamentu Jerál Estadu (OJE) tinan 2020 ne’ebé la pasa iha Parlamentu Nasionál ne’e,haterus liu povu nia moris loro-loron ,tamba orsamentu duadésimal ne’e funsioná de’it makina estadu no uza hodi ba selu de’it salariu funsionáriu nian osan iha ne’ebé povu atu utiliza ba fa’an sasan iha merkadu mós ema la hola ona,tamba osan laiha”, dehan   Camilo Ximenes Almeida iha nia kna’ar fatin Segunda(20/01), relasiona ho Orsamentu Jerál Estadu (OJE) tinan 2020, ne’ebé sumba iha parlamentu.

Dekanu Fakuldade Siénsia Sosiais UNTL ne’e esplika, ho situasaun polítiku ne’e fó impaktu, ba povu Timor-Leste nia moris lor-loron, tamba orsamentu duodésimal, atu funsiona deit makina Estadu.

Camilo Ximenes Almeida, mós konsidera Orsamentu Jerál Estadu (OJE) ne’ebé la pasa iha Parlamentu Nasionál (PN) ne’e, distinu VIII Governu Konstitusionál ne’ebé lidera husi Primeiru Ministru Taur Matan Ruak, mos to’o ona nia rohan.

Nune’e mós Primeiru Ministru Governu Jestaun, Taur Matan Ruak, deklara, Koligasaun AMP la eziste ona, desde Orsamentu Jerál Estadu, sumba iha Parlamentu Nasionál, iha Sesta (17/01) fulan Janeiru ne’e.

Orsamentu Jerál Estadu (OJE) tinan 2020 la pasa iha Parlamentu Nasionál (PN) ho votus a favor 13, kontra 15 no abstensaun 25.Tos