FRETILIN preokupadu Xanana la partisipa diálogu ho PR

Vise Xefe bankada FRETILIN, Francisco Miranda Branco, hatete, FRETILIN preokupadu ho Prezidente Partidu CNRT, Kay Rala Xanana Gusmão, ne’ebé la marka prezensa iha Palásiu Prezidensial, hodi responde konvite Xefe Estadu nian atu halo diálogu hodi buka solusaun kona bá impase polítiku iha rai-laran.

“Ami lamenta, balun fila kotuk lakohi atende konvite PR nian, hanesan Xanana”,deklara Deputadu Francisco Branco ba jornalista sira iha PN, Segunda (27/01/2020) ne’e.

Branco relata, reuniaun FRETILIN nian ne’ebé hala’o iha Komite Sentrál FRETILIN semana kotuk, nu’udar instrusaun ba estrutura partidu nian, la’os prepara lista sombra ruma, tanba seidauk iha desizaun husi Prezidente Repúblika (PR), Francisco Guterres Lú Olo.

 “Hanesan partidu ne’ebé iha responsabilidade ba povu no Estadu nia moris, ami reuni, atu nune’e fó diretiva ka instrusaun ba estrutura partidu nian, atu bele akompaña situasaun, nune’e sira bele hatene katak, partidu ne’e iha preokupasaun, la’os partidu ne’e hein de’it atu ba tu’ur iha kadeira, maibé partidu ne’e iha responsabilidade, atu rezolve povu nia moris,  no Estadu nia moris. Kadeira la’os importante, ba tu’ur hodi ukun, la’os tu’ur atu hadau malu kadeira, tu’ur la’os atu hanoin de’it ba ukun na’in sira-nia interese, maibé haluha tiha kompromisu ne’ebé halo ba povu katak, atu dezenvolve povu no Estadu nia moris. Maibé ita labele espekula lai, tanba tempu sei naruk, ita fó tempu lai ba PR, hodi nune’e bele rezolve hakmatek  ba situasaun bo’ot liu Estadu nian”, tenik deputadu opozisaun ne’e.

Deputadu FRETILIN ne’e mós subliña tan, partidu FRETILIN hakarak iha formasaun governu ida ne’ebé tuir prinsipíu partidu nian, bainhira Xefe Estadu fó konfiansa.

“FRETILIN iha prinsipiu mak unidade nasionál, no libertasaun nasionál, entaun formasaun governu tuir ami nia prinsípiu”, realsa Branco.

Relasiona ho asuntu ne’e, GMN tenta konfirma ho Xefe bankada CNRT, Duarte Nunes ho deputadu bankada CNRT sira, maibé lakohi fó komentáriu, tanba konsidera, ema hirak ne’ebé ko’alia aat Xanana, nu’udar aktu toman aat ne’ebé gosta hatudu ba líder bo’ot sira.

Maske la hetan prezensa husi prezidente partidu CNRT,  Kay Rala Xanana Gusmão, maibé iha loron 23, fulan Janeiru ne’e, reprezentante partidu CNRT, hamutuk ho sekretáriu jerál partidu CNRT, hasoru malu ona ho Xefe Estadu, hodi responde pedidu Xefe Estadu nian ba diálogu.say