Parlamentu mamuk, Arão Noe: “ Ha’u lakohi komenta tanba OJE la pasa”

Hafoin diskusaun proposta Orsamentu Jerál Estadu (OJE) ba tinan 2020 ne’ebé la pasa no sumba iha Parlamentu Nasionál (PN) iha semana kotuk, iha Segunda (20/01/2020), GMN observa katak, uma fukun Parlamentu Nasionál ne’ebé nu’udar fatin diskute povu nia  moris sai mamuk no silénsiu.

Maske nune’e, estrutura meza Parlamentu Nasionál, ne’ebé kompostu husi Prezidente Parlamentu, Vise Prezidente no Sekretária da meza halo enkontru, maibé la fó asesu ba média.

Hafoin ne’e, GMN tenta halo intervista ho Prezidente Parlamentu Nasionál, Arão Noe de Jesus Amaral, maibé nia hateten katak, ho situasaun polítika nune’e, nia lakohi fó kometáriu.

“ Ha’u lakohi komenta, tanba OJE la passa”, hateten PPN Arão Noe ba jornalista sira iha PN, Segunda horseik.

Entertantu, ajenda ne’ebé antes ne’e aprova iha reuniaun líder bankada, tuir loloos hahú Segunda loron 20 to’o 30 fulan ne’e, atu diskute proposta OJE 2020 iha faze espesialidade,  maibé labele realize ajenda refere, tanba proposta Orsamentu Jerál Estadu refere la passa iha jeneralidade, tanba deputadu ne’ebé maioria iha koligasaun AMP, husi partidu CNRT, vota abstensaun no deputada ida vota kontra proprosta OJE ne’ebé propoin husi governu da-ualu, ne’ebé CNRT mós hola parte hamutuk ho partidu PLP ho KHUNTO.say