PN halo audiénsia ho kompañia fornesedór kombustível sentru elétrika Hera-Betano

Atu deskute kona-bá oinsá fornese kombustível no halo manutensaun ba sentru elétrika Hera no Betano, iha Sesta, loron 10, fulan ne’e, komisaun E ne’ebé trata asuntu infraestrutura iha Parlamentu Nasionál (PN) hala’o audiénsia ho kompañia Esperança Timor-Oan (ETO) no Wartsila.

“Orsamentu ba fornese kombustível  iha tinan 2019 hamutuk millaun USD60, maibé ba tinan 2020 sa’e ba millaun USD147, nune’e presiza halo klarifikasaun. Ami bolu sira, tanba orsamentu ba EDTL por volta millaun USD66, ita tau persentajen 72 husi total orsamentu ba Ministériu Obras Públika (MOP) ne’e boot tebes, tanba ne’e, ami preokupa tenke hatene loloos, tanba antes PN atu halo aprovasaun orsamentu tenke hatene“, Prezidente komisaun E PN, Abel Pires ba jornalista sira iha PN, foin la-lais ne’e.

Nia esplika, razaun amenta osan ba EDTL ne’e PN la hatene, tanba ne’e mak PN hakarak buka hatene liu husi halo audiénsia ho MOP no kompañia fornesedór kombustível no manutensaun ba sentral elétrika Hera no Betano, hodi hatene utilizasaun kombustível kada loron ne’e hira.

“Durante halo audiénsia ho kompañia sira ne’ebé fornese kombustível ba Hera no Betano halo esplikasaun di’ak tebes, tinan ne’e 150 jutas litros boot tebes bazeia ba audiénsia iha tinan kotuk, iha fulan Novembru, tinan 2019. Ami hatene númeru, tinan-tinan ami la halo audiénsia ho kompañia sira, maibé amenta orsamentu 107%, ami presiza hatene sé mak ami bele ba ko’alia, ami tenke ko’alia ho kompañia fornese mina no halo manutensaun, ami husu kondisaun ril”, tenik Abel.

Husi parte seluk, Jerente downstream kompañia ETO, Alberto Soares Aniceto, hateten, audiénsia ida ne’e, atu halo komparasaun orsamentu tinan  kotuk (2019) no tinan ida ne’e.

“Durante fornese kombustível difikuldade ne’ebé ami hasoru kona-bá termu pagamentu, iha kontratu eskrita loron 30 atu halo pagamentu, maibé

governu la kumpre, ho difikuldade hirak ne’e kompañia rasik rezolve fali kustu ne’e ho banku, tanba kontratu ho nia kustu ne’ebé boot tebes“, subliña Alberto.

Iha audiénsia ne’e ko’alia kona-bá oinsá fornese kombustível ba sentru elétrika Hera no Betano, tanba kompañia ETO no Sakom mak durante ne’e fornese kombustível ba área rua ne’e no Kompañia Wartsila mak toma konta manutensaun ba sentru elétrika Hera no Betano. Maibé kompañia Sakom la marka prezensa iha audiénsia ne’e. ety

Leave a Reply

Your email address will not be published. Required fields are marked *