Ramos Horta kongratula maturidade povu Timor-Leste

Eis Prezidente Repúblika, José Ramos Horta kongratula ho maturidade polítika povu Timor-Leste (TL) nian, tanba maske enfrenta impase polítiku ho tempu naruk, maibé situasaun iha rai-laran la’o hakmatek nafatin.

Nune’e, laureadu nobel da paz ne’e kontente ho kontribuisaun povu Timor-Leste nian, ba situasaun iha rai laran, no husu populasaun atu kontinua hakmatek hodi hein dezisaun husi Prezidente Repúblika.

Ramos Horta hato’o asuntu ne’e ba jornalista sira, hafoin akompaña atividade kuda ai-oan iha Munisípiu Manatuto, Sesta (24/01/2020).

“Partidu polítiku halo diálogu ho prezidente, prezidente konvoka partidu tuir prezidente nia knar halo konsulta, partidu hotu kontribui di’ak tebe-tebes tanba iha Timor tomak laiha violensia laiha tensaun iha distritu, subdistritu, suku, aldeia, hakmatek los, laiha problema polítiku no problema violensia laiha, entaun ita fó tempu ba prezidente fó tempu ba partidu sira sei hetan solusaun”, dehan, Ramos Horta.

Nune’e, Ramos Horta aprofunda liutan ho situasaun kalma, nia parte hato’o mos ba korpu diplomátiku, situasaun kalmu diak tebe-tebes ne’e hatudu Timor nia demokrasia nia maturidade.

Maske, iha krizi nia laran maibe prezidente nia knaar halo konsulta ho líder sira, partidu polítiku sira reuniaun namanas hela, halo reuniaun intermu reuniaun ho prezidente repúblika.

“Ita haree solusaun saida mak atu mai husi prezidente, prezidente la halo dezisaun arbiru nia rona partidu polítiku sosiedade sivil  rona konsellu estadu tetu buat hotu sukat buat hotu bele halo dezisaun, Líder partidu polítiku hateten, dezisaun ne’ebé prezidente halo ami sei simu, tanba ha’u lahatene kada partidu nia pozisaun saida ha’u koalia ho balun nível individual nível pessoal, ita iha responsabilidade moral atu kontribui ba demokrasia ha’u hatene líder partidu polítiku halo reuniaun internu ho maturidade ho substansia, ha’u kontente, tanba ha’u hatene ne’e no rona ne’e”, dehan, Horta.

Entretantu, dadaun ne’e Xefe Estadu konvida ona líder partidu polítiku sira, líder nasionál, sosiedade sivíl no konfinsaun relizioza sira, hodi halo diálogu atu buka solusaun ba impase polítiku iha rai-laran. ina