Semana ne’e PR Lú Olo sei hasoru malu ho líder polítiku sira

Xefe Kaza Sivíl Prezidensia Repúblika,  Francisco de Vasconcelos hatete, semana ne’e  Prezidente Repúblika Francisco Guterres Lú Olo , sei hasoru malu ho lider polítiku sira hotu, hodi buka solusaun ba impase polítiku ne’e.

“Prezidente la deklara nia pozisaun, maibé Prezidente sei prepara atu konvida líder partidu polítiku sira hotu hodi trata asuntu sira ne’e, kuandu bainbira preparadu  ona, depois ha’u informa ba jornalista”, dehan Xefi Kaza Sivíl ne’e ba Jornalista sira, Segunda (20/01/2020) iha farol Díli.

Francisco de Vasconcelos haktuir, nia simu orientasaun husi Xefe Estadu, atu prepara konvite,  kuandu preparadu hotu ona, iha  semana ida ne’e nia  laran bele hasoru ona líder polítiku sira.

“Maibé data fiksu Prezidente mak desidi, laos  ha’u mak desidi, Prezidente la’os konvida deit lider polítiku sira, maibé konvida mós, lider nasional  sira, sosiedade sivíl, jurista sira,  inklui mós konviksoens relijioza sira, atu rona opiniaun ema hotu nian, saida mak diak liu ba ita-nia  Estadu ida ne’e”, realsa Francisco.

Francisco Subliña, ohin konvite sira komesa sai ona ba ema hirak ne’ebé Prezidente konvida.oly