JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Taur Matan Ruak: AMP la eziste ona tanba CNRT mak sobu

Taur Matan Ruak: AMP la eziste ona tanba CNRT mak sobu

Primeiru Ministru Taur Matan Ruak deklara , koligasaun Aliansa Mudansa Ba Progresu (AMP), la ejisti  ona,  tanba partidu CNRT mak hamonu AMP iha debate Orsamentu Jeral Estadu tinan 2020 iha Parlamentu Nasionál.

Koligasaun partidu tolu hanesan CNRT, PLP NO KHUNTO hodi harii Governu Aliansa Mudansa Ba Progresu Ka AMP, la dura to’o tinan lima, tanba governasaun AMP ne’ebe lidera husi Primeiru Ministru Taur Matan Ruak foin la’o tinan rua, partidu CNRT hamonu tiha koligasaun ne’e iha debate jeneralidade OJE tinan 2020.

Razaun CNRT hamonu koligasaun AMP hodi vota abstein ba OJE tinan 2020 ne’e, tanba senti sai vítima ba koligasaun AMP nee rasik, tanba membru governu nain hitu husi CNRT, durante tinan rua ona seidauk simu posse husi Xefe Estadu.

Ho OJE tinan 2020 ne’ebé la pasa iha Parlamentu Nasionál, Primeiru Ministru Taur Matan Ruak konsidera, koligasaun AMP la eziste ona, tanba deputadu CNRT sira mak hamonu koligasaun ne’e.

“Informa ba  Prezidenti Repúblika kona bá debate orsamental, públiku hatene debate orsamental ne’e iha Sesta feira semana kotuk, sumba ka la liu, ne’e situasaun ida ké hatudu, primeiru lugar katak, AMP laiha ona, segundu lugar hautudu katak, ita iha nezesidade hodi ultrapasa situasaun ida ne’e”, dehan Xefe Governu Taur Matan Ruak ba Jornalista sira, hafoin hasoru malu ho Prezidente Repúblika, Francisco Guterres Lú Olo, Segunda (20/01/2020) iha Palásiu Prezidensial Nicolau Lobato Bairo Pité, Díli.

Iha sorumutu ne’e, Taur Matan Ruak informa ba Xefe Estadu katak, nia fatin  nu’udar Primeiru Ministru ne’e, despozisaun ba Prezidenti Repúblika, desizaun saida deit  nia prontu simu no apoiu.

Lee hotu :   G7+ kontribui desizaun ONU nian ba harii paz

Xefe Governu no lider másimu husi Partidu PLP ne’e hatutan, AMP iha kompromisiu tolu ne’ebé importante, ida programa governu nian tenke pasa katak, partidu tolu aliansa ne’e tenke vota hanesan no hamutuk, segundu, orsamentu tenke pasa, terseiru lei sira estruturante ne’e  tenke liu.

“Orsamentu la liu, no CNRT mak vota kontra, sinal saida?, hatete katak AMP laiha ona, deputadu CNRT sira mak baku mate tiha AMP iha Sesta feira ne’e, ha’u husu deskulpa ba lideransa CNRT nian, PLP nian, KHUNTO nian, ba militante no simpatizante hotu ne’ebé servisu mate an para AMP ne’e akontese, mais infelismente deputadu CNRT sira baku mate tiha AMP, ha’u la hatete ne’e traisaun, ha’u rona diskursu       Xefe bankada CNRT nian  ne’ebé  hatete buat rua, tanba kandidatu nain 7 ne’ebé Prezidenti Repúblika la fó posse, segundu tanba Primeiru Ministru sobu sistema, entaun ha’u nia pergunta?, hanesan kareta ida karik Prezidente hasai tiha  roda ida Primeiru Ministru sobu tiha kadeira iha kareta laran, deputadu sira to’o mai fakar tiha mina rai no sunu tiha kareta, agora ida sobu kareta roda ne’e mak sala ka?  sobu deit kadeira mak sala? no ida sunu kareta ne’e mak sala?”, relata Taur Matan Ruak.

Taur salienta, responsabilidade tomak ba deputadu CNRT nian  iha Parlamentu Nasional, sira mak sobu AMP, nu’udar Primeiru Ministru nia onradu ba konvite AMP nian, liu liu CNRT nian para lidera governasaun ida ne’e, no nia agradese ba apoiu hotu.

“Ha’u hakarak hatete ba deputadu sira katak, ha’u la gosta presaun no santajen (ameasa), tanba ne’e fila ba Prezidente Repúblika mak desidi, tanba ne’e mak ohin ha’u mai informa, no Prezidente Repúblika rona saida mak  ha’u hato’o, no sei ko’alia ho lider partidária sira, no tuir lei enkuantu laiha Primeiru Ministru ida troka ha’u, ha’u sei kontinua Primeiru Ministru, aban dader mak Primeiru Ministru foun iha ne’eba ona, entaun bain rua ne’e ha’u lai mai ona”, afirma Taur.

Lee hotu :   TR simu lista kandidatura partidu koligasaun no individu 10

Nia Súblina, iha istória Timor-Leste nian, primeiraves iha VIII Governu nia tempu mak menus  husi tinan rua Xefe Governu ne’e lori proposta OJE ne’e ba Parlamentu dala haat.

“Laiha istória iha Timor governu ida iha menus tinan rua, lori propsota OJE dala hat ba Parlamentu Nasional, signifika katak, ne’e “luar biasa”  (extra ordinariu) falta deit Parlamentu sakrifika ha’u hanesan tara iha ai leten. Solusaun sempre hetan, problema iha solusaun iha, kadiadu iha, xavi iha, agora tenke fera ulun, tanba ne’e mak ha’u aproveita ha’u apela ba populasaun Timor laran tomak, inan aman sira iha Suku no Aldeia, Postu to’o Munisípiu sira, para tu’ur hakmatek”, hakotu Taur.oly

Add to Comments Here!!!!

error: Content is protected.
Secured By miniOrange
You might also like:
Ahi han salaun enkontru sede CNRT

Ahi han salaun enkontru sede partidu...

Tribunál Distritál Díli (TDD) absolve kazu sosa prado

TDD, Segunda (20/01/2020) hala’o julgamentu kontinuasaun...

Emprezáriu: Governu falla halo pagamentu ba projetu 143

Diretór Kompañia Laloran Fronteira Unipessoal. Lda, ...

Close